Ema Na’in-rua Mate Tanba Inséndiu no Ai Hanehan

Hatutan.com, (06 Fevereiru 2023), Díli—Sekretária Estadu Protesaun Sívil (SEPS), liuhosi Autoridade Protesaun Sívil (APC-Sigla Portugés), rejísta vitima na’in-rua (2) mate tanba inséndiu iha Munisipiu Baucau no ai-hanehan iha Ermera.

Diretór Relasaun Externa no Komunikasaun APC, Anacleto Caetano relata dadus Dezastre Naturais liu hosi konferénsia imprénsa iha kna’ar fatin Caicoli, Segunda (06/02/2023).

Dadus ne’e autoridade protesaun sívil rejista durante semana ida hahú hosi loron 01 to’o 06 Fevereiru 2023, iha ne’ebe inséndiu iha Baucau rezulta vítima Maria Guterres (64) tenke lakon vida bainhira ahi-han uma iha toos.

Lee Mós:SEPS Rejista Tan Vítima Dezastre Naturál 200

Tuir informasaun katak, iha kalan molok toba, vitima sunu lilin iha uma-laran, maibé haluha atu hamate ikus mai rezulta ahi han uma ne’e inklui vitima rasik motuk iha uma-laran.

Iha Munisipiu Ermera tanba akontese anin, halo ai-monu hodi hanehan uma ida rezulta vítima Afredo Salsinha mate fatin ho vitima Julito Salsinha kondisaun kanek gráve.

“Hafoin akontesimentu parte familia tenta evakua duni vitima na’in-rua mai atu hala’o tratamentu saúde iha Hospital Nacional Guido Valadáres (HNGV), Bidau, Dili maibé la konsege salva vitima Afredo Salsinha. Enkuantu, vitima Julito Salsinha oras-ne’e sei hala’o tratamentu saúde iha HNGV,” Diretór Relasaun Externa no Komunikasaun APC, Anacleto Caetano informa liuhosi konferénsia imprénsa iha kna’ar fatin Caicoli, Segunda (06/02/2023).

La’ós ne’e de’it, iha Ermera, akontese mós dezastre naturál rai-halai  hodi hanehan mós uma ida, maibé la rezulta ema ruma mate.  

Hafoin akontesimentu dezastre sira ne’e, ekipa Autoridade Protesaun Sívil, liuhosi komandu munisipiu sira tun diretamente bá terrenu hodi halo levantamentu dadus, inklui fó kedan apoiu emerjénsia bá vitima sira.

“Apoiu emerjénsia hosi kolega sira iha autoridade protesaun sívil munisipiu Ermera ho Baucau mak hansan food item ho non food item,” Anacleto informa.

Kona-bá vitima sira ne’ebé mak lakon vida, ekipa APC hamutuk Ministériu Solidariedade Sosiál no Inkluzaun (MSSI), hamutuk ho autoridade lokál sira, fó ona kontribuisaun hanesan food item.

Tuir dadus hosi Autoridade Protesaun Sívil, daudaun ne’e Munisipiu Ermera ho Ainaro mak mosu udan ho intensidade forte.

Tanba ne’e, APC husu populasaun tomak iha territóriu nasionál atu kuidadu aan nafatin, hasees aan hosi fatin risku sira, nune’e bele livre hosi dezastre.

Iha biban ne’e, Adjuntu Komandante Terrestre iha Autoridade Protesaun Sívil (APC), Martinho Fátima esplika, liga ho dadus uma hirak ne’ebé estragus no iha direitu atu asesu bá iha rekuperasaun ne’e, tenke liuhosi prosesu ida.

Bainhira mosu dezastre iha munisipiu hothotu, sira nia dadus ne’e halo verifikasaun, depois haruka liuhosi sistema ida.

Bainhira dadus dezastre sira iha munisipiu mak rejístadu iha sistema baze dadus nasionál maka ekipa sira imprime dala-ida, entrega bá Sekretáriu Estadu Protesaun Sívil (SEPS), Joaquim Martins Gusmão, halo aprovasaun, hafoin halo planu distribuisaun apoiu bá vitima sira.

Jornalista: Rogério Pereira Cárceres