Oan Envolve iha Krime, Sei Bolu Hotu Inan-Aman

Hatutan.com, (07 Fevereiru 2023), Díli-Bainhira inan-aman sira la kontrola sira-nia oan hodi mete ka envolve iha krime ne’ebé perturba orden públiku,  autoridade Polísia sei bolu mós bá inan-aman sira atu presta deklarasaun iha Polísia.

Lee Mós : Xefe Estadu Husu Autoridade Defeza-Seguransa Kombate Krime Organizadu Ho Sériu

Komandante PNTL Munisipiu Díli, Superintendente Xefe Polísia Natérçia Eufrásia Soares Martins,. Foto/Elio dos Santos da Costa

Liuhosi programa diálogu bá pás  ne’ebé organiza hosi Prezidente Repúblika, Tersa (07/02/2023), Komandante PNTL Munisipiu Díli, Superintendente Xefe Polísia Natérçia Eufrásia Soares Martins, alerta bá inan-aman sira atu kontrola oan sira nia movimentu hodi la bele envolve iha aktu krime ne’ebé prejudika ema seluk nia moris hakmatek.

Superintendente Xefe Polísia Natérçia Eufrásia Soares Martins, informa katak foin lalais ne’e PNTL kaptura mós labarik sira ne’ebé envolve iha konflitu, balu ho idade ki’ik no hirak ne’e hotu akontese tanba laiha kontrola hosi inan-aman sira bá nia oan sira.

“Tanba saida, labarik sira ne’e ho idade ki’ik, mais brani tebes atu envolve iha konflitu. Keta família sira ladún interesse karik, dala-ruma família sira tau importánsia ka preukupasaun bá iha serbisu, ka partidu nian, organizasaun arte-marsiál hodi  haluha tiha oan sira,”  nia hateten.

Natérçia Eufrásia Soares Martins, ezíje devér no responsábilidade família, inan ho aman sira nia no nia rasik mós fó ona orientasaun bá komandante eskuadra sira bainhira sira tun bá atua problema ruma iha terrenu, atu kualker sé de’it mak envolve iha ne’ebá, kaptura hotu kedan sira lori mai polísia.

Lei garante bá iha polisia, atu asegura ema sira ne’ebé mak envolve ka deskonfia envolve iha krime, durante tempu oras 12 nia laran hodi halo identifikasaun.

“Foti hotu kedas mai iha ne’e, husik sira deskansa tiha iha ne’e, depois ita haree. Sé karik, identifika nia idade minoridade, saida mak atu halo. Hanesan baibain, bainhira polisia identifika, husik sira sai fali. Maibé, agora oin seluk, bolu inan-aman mai para ita koñese inan-aman mak sé. Lori xefe  suku ho xefe aldeia sira mós mai para koñese ema ne’ebé hela iha ita-boot nia bairru. Mai to’o iha oin, para koñese, labarik ne’e sé nia oan,” komandante Natérçia hateten.

PNTL sei haruka inan-aman sira ne’e halo kedan deklarasaun ida iha autoridade suku, Ofisial Polisia Suku (OPS) sira nia oin, katak, bá oin, labele abandona tán oan sira. Sé lae, inan-aman mak hatene, oan sira partisipa iha krime, saida mak sei aplika tuir lei.

Komandante Natérçia afirma, polísia sempre prontu iha oras 24 nia laran, maske dala-ruma mosu bá tarde, tanba fallansu barak, transporte limitadu, susar atu fasilita, komandante eskuadra atu mobiliza nia membru sira.

Jornalista: Rogério Pereira Cárceres