Hatutan.com, (07 Fevereiru 2023), Díli—Konsilleiru Otélio Ote eleitu hanesan Prezidente Conselho Imprensa (CI) bá restante mandate 2023-2025, iha plenária extraordináriu Tersa, (07/02/2023).
Liuhosi eleisaun iha sala plenária, CI, Quintal Boot, membru CI na’in lima (5), eleze restante mandatu ba Konselleiru Otelio Ote hodi lidera órgaun reguladora ne’e durante períodu tinan 2023-2025.
Lee Mós: Molok Amito Eleitu bá Reprezenta Jornalista Iha CI, Konferensista Hakilar “Duni-sai” SEKJER TLPU Hosi Konferénsia AJTL
Iha konferénsia imprensa, Diretór Ezekutivu CI, Rigoberto Monteiro hamutuk ho Prezidente eleitu no membru na’in-haat anúnsia kedan rezultadu votasaun ne’e ba públiku.
“Ohin, iha plenária extraordinariu ho prezensa membru na’in-lima, sira hili ona Prezidente difinitivu ba períodu 2023 até 2025,” Rigoberto Monteiro esplika.
Membru na’in-lima ne’e hili malu tuir estatutu Conselho Imprensa artigu 23, eleze Konselleiru Otélio Ote hanesan Prezidente Conselho Imprensa definitive.
Diretór Ezekutivu hanesan sekretariadu Conselho de Imprensa nian, sei haruka naran Prezidente Definitivu no membru foun Conselho de Imprensa ne’ebé foin eleze hosi jornalista sira ba Parlamentu Nasionál hodi hetan tomada de posse.
Prezidente Definitivu, Otélio Ote kompromete atu kontinua luta hodi atinze Liberdade imprensa no Liberdade espresaun nomós hametin profisaun iha terrenu liu hosi hametin kode étika jornalista.
Prezidente eleitu mós sei halo konsolidasaun interna hodi buka hatene buat barak liutan iha CI Inklui sei konsolida instituisaun mídia hodi buka hatene mídia sira nia kondisaun no performa.
Prezidente eleitu mós esforsu maka’as hodi armoniza partisipasaun mídia, editór no jornalista sira iha planu sira ne’ebé Conselho de Imprensa trasa tiha ona.
Prezidente Sesante Conselho de Imprensa, Virgílio da Silva Guterres hato’o pedidu rezignasaun hosi kargu Prezidente no Membru Conselho de Imprensa, iha loron 19 Dezembru 2022.
Iha loron 27 Janeiru 2023, Conselho Imprensa realiza konferénsia ba Asosiasaun Jornalista Timor Lorosa’e (AJTL), iha salaun Delta Nova, Comoro, Dili, eleze Amito Araújo hodi substitui reprezenta jornalista sira.
Lee Mós: Pedidu Rezignasaun Virgílio Guterres Aprovadu, Francisco Belo Prezidente Interinu CI
Jornalista: Vito Salvadór
