PNTL Díli Identifika Nesesidade Hotu Atu Asegura ElPar 2023

Hatutan.com, (10 Fevereiru 2023), Díli-Polisia Nasionál Timor-Leste (PNTL) Munisípiu Díli hahú halo preparativus no identifika nesesidade hotu atu asegura eleisaun parlamentár 2023 la’o ho livre,  pás no  hakmatek.

Lee Mós : Papa Francisco Hakarak Kampaña Eleitóral iha TL La’o ho Pasífika

Membru Polísia Nasionál Timor Leste (PNTL) hosi Bataliaun Orden Publika (BOP) organiza formatura jerál hodi hala’o patrullamentu konjunta iha Dili, Sesta (09/09/2022). Foto/Elio dos Santos da Costa.

Komandante PNTL Munisípiu Díli,  Superitendente Xefe Polísia, Natércia Eufrásia Martins Soares, informa oras ne’e dadaun, Komandu PNTL Díli hahú ona halo identifikasaun bá fatin sira iha área jurisdisaun Munisípiu Díli  nian ne’ebé konsidera iha poténsia no risku bá konflitu.

“PNTL Díli nia rekursu ne’ebé iha ami identifika situasaun sira, área risku sira bá konflitu nian,” Superitendente Xefe Polísia, Natércia Eufrásia Martins Soares, hateten hafoin sorumutu ho Parlamentu Nasionál, foin lalais.

Komandante Natércia dehan, hanesan autoridade polisial, la serbisu mesak. Ko’alia kona-bá atuasaun polisial, ne’e kompeténsia, lei atribui bá polisia sira, atu uza kualker forsa, tuir lei hatete, hodi halo prevensaun ka hodi responde bá situasaun ne’ebé mosu.

Komandante Natércia hateten, ho krime sira hanesan ne’e, karik forsa sira mak hamutuk, ho objetivu ida de’it, bele kontrola situasaun ne’e, tanba polisia fiar katak, bainhira mosu distrubiu ka ema baku malu ka konflitu, ne’e sempre afeta bá ema sira ne’ebé mak kbiit laek, liu-liu bá feto, labarik, no maluk sira ne’ebé mak laiha forsa.

Nia hateten, iha kampaña no eleisaun parlamentár mai ne’e, polísia sei mobiliza hotu ninia forsa tomak, la’ós polisia de’it, tanba iha eleisaun, normalmente, polísia ne’ebé maka koloka iha territóriu ne’e, mak hanesan Komandu Munisípiu, Unidade Espesiál Polísia (UEP), Unidade Polísia Marítima (UPM), Unidade Patrullamentu Fronteira (UPF), sira hotu asegura prosesu eleitóral ne’e tomak atu la’o ho seguru.

Jornalista: Rogério Pereira Cárceres