Bolseiru 29 Dezloka Hodi Kontinua Estudu Espesializasaun Iha Cuba

Hatutan.com, (12 Fevereiru 2023), Díli—Bolseiru profisionál saúde Timor Oan na’in 29 dezloka ona ohin, hodi kontinua hala’o estudu espesializasaun iha Cuba.

Bolseiru profisionál saúde Timor Oan na’in 29 dezloka ona ohin, hodi kontinua hala’o estudu espesializasaun iha Cuba. Foto/Média MS.

Antes ne’e Ministra Saúde, Odete Maria Freitas Belo agradese tanba nasaun Cuba sei fó oportunidade ba bolsa estudu timoroan sira atu kontinua estudu.

Lee Mós: Pesoál Saúde 2,276 Rejistu iha Baze Dadus Ministériu Saúde

“Ha’u agradese tebtebes ba Cuba liu hosi Universidade ida ne’ebé mak sei hakarak simu ita bá eskola, iha universidade balun ne’ebé mak bainhira ita hakarak atu kontinua estudu, kritéria ida mós sira haree ba idade. Bainhira idade liu ona, sira tau kedan kritéria iha ne’ebá maibé nafatin ha’u ko’alia kona-ba nasaun ida-ne’e sei loke dalan ba ita, sei fó dalan ba ita atu bele lori médiku ho númeru ne’ebé mak boot,” Odete Maria Freitas Belo hateten iha Serimónia despedida ne’ebé hala’o iha salaun Palásiu Cinzas, Caicoli, Díli, Kinta (26/01/2023).

Parseria entre Timor-Leste ho Cuba sei diak liu tán iha futuru atu bele fó oportunidade ba timoroan sira ne’ebé sei tuir-mai, presiza atu bá kontinua sira-nia estudu atu no fila-mai hodi serbí nasaun Timor-Leste.

Ministra apela ba bolseiru sira atu estuda di’ak, kumpri saidá mak ema ne’eba ko’alia, tanba TL iha akordu ho universidade nune’e bainhira estudante sira senti dehan ida-ne’e la loos tenke komunika ho pontu fokál atu haree akordu ne’e.

Bolseiru na’in-29 ne’e iha área, medisina intensivista emerjénsia na’in tolu, onkolojia tolu, patolojia klíniku ida, patolojia anatomia ida, radiolojia rua, medisina fízika no reabilitasaun ida, psiquiatria ida, kardiolojia na’in haat, otorrinolaringolojia ida, pediatria pediatria na’in ualu, enfermeiru intensiva no emerjénsia na’in tolu nomós enfermeiru neonatal na’in ida.

Jornalista: Rogério Pereira Cárceres