Hatutan.com, (15 Fevereiru 2023), Díli—Parlamentu Nasionál (PN), liuhosi Prezidente Aniceto Longuinhos Guterres hasai ona desizaun hodi estende tán mandadu Komissáriu Comissão Anti Corrupção (CAC), Sérgio Hornai to’o Parlamentu eleze fali Komissáriu foun.
Sérgio Hornai hateten, iha 2019 eleitu nu’udár Komisáriu bá CAC no hetan posse iha loron 21 janeiru 2019 bá mandatu tinan haat ne’ebé termina ona iha 21 jeneiru 2023.
Lee Mós: Governu Propoin José Ximenes Lidera CAC
“Ohin, ha’u ezerse nafatin funsaun nu’udár Komissáriu CAC atu asegura funsionamentu instituisaun ida ne’e ninian. Hahú hosi dia 21 bá leten to’o momentu ne’ebé Parlamentu Nasionál eleze kargu titulár bá iha Komissáriu foun no halo posse,” Sérgio Hornai hateten iha kna’ar fatin Faról-Díli, Kuarta (15/02/2023).
Iha dokumentu ofisiál ida ne’ebé nia simu, tanba desizaun ne’ebé mak mai hosi Parlamentu Nasionál, atu assegura funsionamentu instituisaun ida ne’e nian, to’o momentu ne’ebé oportunu atu bele eleze Komissáriu foun bá CAC Timor-Leste ninian, nune’e bele substitui Komissáriu sesante atu bele halo funsionamentu normál sira.
CAC nu’udár instituisaun Estadu, hanesan órgaun Polísia kriminál ne’ebé mak responsável bá iha aktu sira ne’ebé iha, relasionamentu bá dilijénsia no inkéritu sira ka iha politika prevensaun nomós iha investigasaun criminal korrupsaun iha Timor-Leste.
Komissáriu CAC Tenke iha Esperiénsia Aas Kona-bá Investigasaun
Iha okaziaun ne’e, Komissáriu Sérgio Hornai fó mós ninia preferénsia bá Komisáriu foun CAC nian ne’ebé atu mai, tenke ema ne’ebé iha esperiénsia aas kona-bá serbisu sira investigasaun nian. Sidadaun hotu-hotu ne’ebé elejível komforme iha Lei númeru 08/2009.
“Preferénsia bá ema sira ne’ebé iha abilidade, integridade, laiha inkompatibilidade, nú minimu nia iha esperiénsia ne’ebé aas, iha serbisu investigasaun ninian atu bele mai. Fora hosi ida ne’ebá, labele. Tanba Lei hateten katak, instituisaun ne’e tenke nakonu ho integridade, imparsialidade atu bele hatuur metin instituisaun ida ne’e,” Sérgio Hornai hateten.
Sérgio Hornai agradese, tanba iha tinan haat bele kaer responsábilidade ida ne’e ho nakonu maski hanesan ema, dala-ruma iha frakeza, maibé, nia bele kaer ida ne’e ho responsábilidade, to’o ninia mandatu termina no sei halo kontinuasan balun to’o entrega podér ba Komissáriu eleitu.
Jornalista: Rogério Pereira Cárceres
