Governu Distribui Tán Bero Fiberglass bá Grupu Peskadór 8 Hosi Ataúro

Hatutan.com, (23 Fevereiru 2023), Díli– Governu  liuhosi Sekretáriu Estadu Peska, Kinta (23/2/2023), distribui tán  bero  fiberglass ho nia ekipamentu peska nian bá grupu peskadór  ualu (8) hosi Munisípiu Ataúro.

Lee Mós : Governu Distribui Bero Fibra Glass 10 bá Grupu Peska Munisípiu Díli

Sekretáriu Estadu Peska, Elidio de Araújo hamutuk ho autoridade sira distribui tan bero fiberglass ho nia ekipamentu peska nian bá grupu peskadór ualu (8) hosi Munisípiu Ataúro, Kinta (23/2/2023). Foto/Elio dos Santos da Costa

Iha primeiru etapa, Ministériu Agrikultura no Peska (MAP) distribui ona bero fiberglass ho nia ekipamentu peska nian bá grupu peskadór 10 iha Postu Administrativu Dom Aleixo ho Kristu Rei, Munisípiu Díli, Kinta, 16 fulan-Fevereiru 2023.

Bero fiberglass ne’e fornese hosi empreza Sheramor Sucesso Supply LDA  nu’udár empreza timoroan  nian ne’ebé manan konkursu públiku iha MAP.   

“Iha prinsípiu katak bá peskadór sira iha oportunidade hotu hanesan para bele hetan apoiu ka tulun hosi Governu, maibé ha’u hakarak hateten, grupu sira ne’ebé mak eziste iha ne’e barak bele hatete katak total peskadór 6,678 depois fahe fali bá grupu ne’e hamutuk 1,310  barak tebetebes entaun Governu  iha posibilidade natoon de’it para atu bele tulun ita-nia grupu sira uitoan, mas fiar katak ne’e programa kontinuasaun sei iha nafatin tamba ne’e mak ha’u hatete katak sira ne’ebé mak hetan apoiu ne’e halo proposta tama mai iha diresaun no iha Gabinete Sekretáriu Estadu  Peska,” Sekretáriu Estadu Peska,  Elidio de Araújo  hateten iha nia lia-fuan badak bainhira distribui bero fiberglass bá grupu peskadór ualu hosi Ataúro ne’ebé hala’o iha Kampu Alor, Díli.

Sekretáriu Estadu Elidio de Araújo, esplika molok proposta ne’e mai tenke iha koñesimentu hosi Xefe Aldeia, Xefe Suku no diretór agrikultór Munisipál  depois mak proposta foin mai iha Sekretáriu Agrikultura no Peska hodi halo verifikasaun no konfirmasaun katak grupu benefisiáriu sira ne’e peskadór duni.

Iha tinan 2020, Governu  anterior sira  mós distribui bero bá peskadór sira bazeia bá proposta hosi grupu peskadór sira.  Nune’e, Governu nafatin kontínua halo planu  apoiu grupu  sira bele ho kuantidade ne’ebé uitoan tuir kbiit Governu nian.

Sekretáriu Estadu Peska, Elidio de Araújo, distribui tan bero fiberglass ho nia ekipamentu peska nian bá grupu peskadór ualu (8) hosi Munisípiu Ataúro, Kinta (23/2/2023). Foto/Elio dos Santos da Costa

“Ita hotu-hotu hatene katak ne’e planu VIII Governu Konstitusionál iha 2021 ita halo planu, ita mós tau planu bá sosa bero fiberglass  hodi apoiu grupu peskadór ho eskala ki’ik.

Timor-Leste, tuir Sekretáriu Estadu Elidio de Araújo,  nu’udár nasaun tenke hanoin ona ró  peska  industrial, nune’e MAP tau planu iha 2021  sosa    ró  unidade  rua, maibé lá konsege  tanba mundu enfrenta pandemia global Covid-19.

Iha 2022, Governu avansa no konsultóriu sira  prepara  dezeñu  ho BoQ  (Bill of Quantity) kompletu, hodi submete bá iha Komisaun Nasional Aprovizionamentu (CNA, sigla portugés) no daudaun empreza haat (4) mak submete ona sira-nia dokumentu konkorre iha konkursu públiku fornesimentu bá ró peska industrial ne’e.

“Ita bele haree rasik kompaña timoroan ne’ebé hatama bero fiberglass ho nia ekipamentu ne’e kualidade. Ita hatene dala-ruma sira lakon, mas ida-ne’e mak orgullu bá Timoroan ida presta servisu bá nia povu no nia Estadu,” Sekretáriu Estadu Elidio Araújo hateten hodi hatudu bá ekipamentu no bero fiberglass ne’ebé empreza Sheramor Sucesso Supply LDA   fornese bá MAP no bá grupu peskadór sira.

Jornalista Estajiáriu : Lazaro Pereira Quefi/ Dirce Sandra da Costa Gomes