Polémika Konstrusaun Eskola Cesar Maulaka, MEJD La Koordena ho Diresaun Terras no Propriedade Ermera

Hatutan.com, (23 Fevereiru 2023), Ermera— Ministériu Justisa (MJ) liu hosi Diresaun Terras no Propriedade Munisípiu Ermera, laiha koñesimentu kona-bá rai ne’ebé Ministériu Edukasaun Juventude no Desportu (MEJD) okupa iha Suku Haupu, Letefoho-vila, hodi halo konstrusaun ba edifísiu Eskola Ensinu Sekundáriu Jerál Cesar Maulaka hamutuk sala de aula neen.

Diretór Terras no Propriedade Munisípiu Ermera, Afonso Salsinha. Foto/Cipriano Colo.

“Kona-bá konstrusaun eskola Cesar Maulaka, parte Terras no Propriedade laiha koñesimentu tanba sira mak deside mesak no ba oin husik la’o bá mak ita haree took se mak loos no se mak sala,”  Diretór Terras no Propriedade Munisípiu Ermera, Afonso Salsinha hateten ba Hatutan.com iha serbisu fatin Gleno, Kinta (23/02/2023).

Lee Mós: Polémika Rai Konstrusaun Eskola Cesar Maulaka, Administradór Letefoho Husu MOP-MEJD Foti Desizaun

Afonso Salsinha esplika, kualkér instituisaun Estadu ka ministériu ida mak presiza atu halo kontrusaun ka halo dezenvolvimentu ruma, hanesan MEJD ne’ebé konstrui eskola Ensinu Sekundáriu Jerál  Cesar Maulaka, prosesu ne’e primeriu sira tenke hato’o pedidu mai Ministériu Justisa (MJ) liu hosi Diresaun Terras no Propriedade Munisipál hodi prosesa no haruka ba iha MJ atu bele atribui direitu ka lisensa rai nian mak foin halo konstrusaun.

Tanba, laiha instituisaun seluk atu hola desizaun ka deside hodi fó lisensa no rekomenda atu utiliza rai Estadu ka rai privadu tanba edifísiu ne’e mós tama iha patrimóniu públiku.

Liga ho konstrusaun edifisiu eskola Cesar Maulaka Letefoho, MEJD ho autoridade lokál sira inklui administradór la halo koordenasaun ho parte Diresaun Terras no Propriedade Munisipál.

“Sira ne’ebé halo konstrusaun ne’e halo desizaun mesak no konstrui edifísiu ne’e no ita laiha koñesimentu. Ne’e ita bele konsidera katak, laiha konsiderasaun ba Ministériu Justisa ne’ebé Lei mak haruka atu administra patrimóniu Estadu sira,” nia dehan.

Tanba ne’e, prosesu ba oin la hatene no se bele Jornalista ba husu took sira katak, sira iha dokumentu ruma hosi Ministériu Justisa ka la’e, ne’ebé justfika katak, rai ne’e rai Estadu ka rai privadu ema nian.

Diretór ne’e mós relembra katak, iha tinan rua liu bá, iha sidadaun ida naran Vicky Chang mai halo reklamasaun no deklara ba Parte Terras no Propriedade Munisipiu Ermera katak, rai ne’e ninian, lori mós testemuña na’in-rua mak hanesan Eis Ministru Justisa, Domingos Maria Sarmento no mós Adolfo Soares.

“Kazu sira henesan ne’e parte Terras no Propriedade Ermera konsidera katak, Vicky Chang mak iha direitu ba uma fatin ne’e. Maibé kona-bá estatutu loloos mak nia rasik seidauk aprezenta dokumentu ka sertifikadu komprovativu ruma iha Diresaun Terras no Propriedade munisipál,” nia informa.

Ba oin, bainhira atu rezolve kazu ida hanesan, ka rezolve direitu hanesan Vicky Chang nian ne’e maka Timor Leste iha ninia Lei númeru 13/2017 ne’ebé ko’alia kona-bá direitu anteriores no Lei ne’e mak sei deside.

Jornalista: Cipriano Colo