MAPKOMS Selebra Kontratu ho Kompañia Global Citra Tama Harii Tore Tolu ho Valor Millaun $1-resin

Hatutan.com, (24 Fevereiru 2023), Díli— Ministru bá Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo,  Sesta (24/2/2023) iha Gabinete MAPKOMS, Palásiu Governu,  estabelese akordu servisu ho kompañia Global Citra Tama sukursál (cabang) Timor-Leste hodi harii tore tolu iha Munisípiu Lautem, Ainaro ho Bobonaro.

Lee Mós : Kazu Projetu Instalasaun Set-top Box RTTL,E.P, Ministru MAPKOMS Konstitui Bá Arguido

MAPKOMS Francisco Martins da Costa Pereira Jerónimo, estabelese akordu servisu ho kompañia Global Citra Tama atu harii tore tolu bá RTTL,E.P. Foto/Media MAPKOMS

Projetu harii tore tolu bá fasilita aumenta kapasidade sistema televizaun dijitál Rádiu Televizaun Timor Leste, Empreza Públiku (RTTL,E.P)  ho nia valor orsamentu millaun $1-resin.

Sita hosi pájina ofisiál  Facebook Ministério dos Assuntos Parlamentares e Comunicação Social katak, projetu ne’e sei hahú iha fulan-Marsu 2023, ho nia durasaun tempu konstrusaun fulan-neen (6).

Tore tolu kontinua halo kobertura bá nivel munisipál no munisípiu sira seluk ne’ebé seidauk hetan kobertura hosi Televizaun Dijitál ,atu nune’e bá futuru atu haree Televizaun la depende ona ba parabola maibé uza antena televizaun.

Ministru Francisco Martins da Costa Pereira Jerónimo iha nia intervensaun, hateten katak asina akordu ne’e bá projetu boot ministériu ninian, iha relasaun ho harii tore tolu ne’ebé mak tenke hala’o iha tinan ida ne’e iha munisípiu mak hanesan Lautem, Ainaro no Bobonaro ho empreza hosi Indonézia Global Citra Tama.

MAPKOMS Francisco Martins da Costa Pereira Jerónimo, estabelese akordu servisu ho kompañia Global Citra Tama atu harii tore tolu. Foto/Media MAPKOMS

Tuir planu Primeiru-Ministru, Taur Matan Ruak, mak sei bá hala’o lansamentu primeira pedra ka hatuur fatuk inan  ne’ebé mak sei realiza iha Lautem.

Diretór PT Global Cirta Tama Indonesia Edy Harton Salim,  kontente tebes tamba bele hasoru malu ho MAPKOMS no promete sei halo servisu hamutuk bá konfiansa ne’ebé fó ba sira nia kampaña atu harii tore Timor-Leste.

Jornalista : Vito Salvadór