AS Marca Kontinua Lidera Tabela Klasifikasaun Segunda Divizaun Hafoin Halakon Kablaki FC 2-1

Hatutan.com, (07 Marsu 2023), Díli—Klubu AS Marca kontinua lidera tabela klarifikasaun segunda divizaun Liga Timorense époka 2022-2023, hafoin halakon Kablaki FC ho skore 2-1.

Klubu AS Marca kontinua lidera tabela klarifikasaun segunda divizaun Liga Timorense époka 2022-2023, hafoin halakon Kablaki FC ho skore 2-1. Foto/LFTL.

AS Marca hatudu superioridade iha jogu daruak kontra Kablaki FC hodi rekolla tán pontu tolu no halo akumalasaun ho pontu tolu antes, ne’ebé AS Marca hetan liu hosi jogu kontra Santa Cruz FC, lori klubu estimadu komunidade Delta IV ne’e rekolla pontus neen no lidera tabela klarifikasaun provizóriu segunda divizaun époka 2022-2023 iha segunda jornada.

Lee Mós: Assalam FC Rekolla Pontu Tolu Dahuluk Iha Liga Timorense époka 2022-2023

Iha primeira parte, ekipa rua hahú ho jogu ne’ebé defensivu hodi hein atu halo kontra atake ba malu, liu hosi bola oportunidade ne’ebé iha.

AS Marca hahú halo jogu iha liña klaran no tenta so’e bola ba avansadu sira liu hosi estremu direita no esquerda maibé ekipa adversáriu sei halo antesipasaun ho di’ak.

Ekipa Kablaki FC ne’ebé la reforsa hosi kapitaun ekipa Joel Alves (6) iha liña médiu koko halo tranzisaun ba jogu hodi buka solusaun liu pasajen bola as, bainhira defeza sira kaer bola sempre lansa kedan pasajen ba avansadu sira hodi koko halo atake ba adversáriu.

Tama ba minutu 11, Kablaki FC tenke halo substituisaun ba Jogadór hodi hasai Rui Gusmão (15) ne’ebé sofre aleija hodi hatama fali João Vítor (8).

Ho substituisaun ne’ebé iha, halo Kablaki FC hahú halo jogu iha klaran hodi organiza kontra atake liu hosi avansadu Julvito Nascimento (9) ne’ebé iha abilidade di’ak atu duel kontra defeza adversáriu.

Jogadór AS Marca Fabrizio dos Santos (3) simu kartaun kinur iha minutu 12 hafoin halo falta hasoru Jogadór adversáriu.

Ekipa rua hahú halo jogu tuir orientasaun taktika ne’ebé treinadór sira orienta hosi kampu ninin no AS Marca lansa atake liu hosi defeza esquerda no lori dunik rezultadu.

Tama ba minutu 15, AS Marca lansa uluk golu ida hodi muda skore ba 1-0 liu hosi Jogadór Carlos Nascimento (21).

Ho golu ne’e halo ekipa rua nafatin halo jogu no kontra atake ba malu, tama ba minutu 28 AS Marca halo substituisaun hodi hasai Fabrizio dos Santos (3) no hatama João dos Reis (66).

Iha minutu 38 Jogadór AS Marca Carlos Nascimento (21) tenke simu kartaun kinur hafoin halo erru iha kampu laran.

Ekipa Kablaki FC halo esforsu atu bele muda skore iha tabela klasifikasaun liu hosi kontra atake ne’ebé iha, maibé ekipa adversáriu mantein asegura sira nia baliza hosi ameasa nune’e to’o tempu primeira parte remata Kablaki FC tenke simu derrota hodi prepara fali ba segunda parte.

Iha segunda parte, ekipa Kablaki FC halo kedan substituisaun hodi hasai Moises Ximenes (14) no hatama Martinho da Costa (3) no hosi ne’e Kablaki FC halo kedan jogu ida nakloke no sempre halo kontra atake ba adversáriu liu hosi pasajen bola badak hosi liña ba liña no Jogadór sira kuaze iha motivasaun atu halo golu.

Tama ba minutu 46, Jogadór AS Marca Filomeno Maucasana (28) simu kartaun kinur hafoin halo falta hasoru Jogadór Kablaki FC iha liña klaran.

Jogadór Kablaki FC Martinho Vaz (19) ne’ebé hetan oportunidade hodi ezekuta bola falta ne’e halo kedan ameasa ida tanba bola ne’ebé nia lansa kona de’it iha besi baliza nian no la konsege tama.

Kablaki FC kontinua domina liu jogu no sempre lansa kontra atake ba adversáriu AS Marca maibé seidauk iha golu ruma akontese.

Kablaki FC hetan oportunidade osan me’an ida liu hosi penalidade, maibé avansadu Julvito Nascimento (9) falla ezekuta nia responsabilidade ne’e ho di’ak tanba bola semo as liu hosi baliza nia leten.

Atu hadi’a liña ne’ebé iha, Kablaki FC halo substituisaun iha minutu 65 hodi hasai João Vítor (8) no hatama avansadu Julião Santos (7) atu bele lansa atake ba adversáriu no hasa’e efetividade iha liña avansadu.

Kablaki FC kontinua halo substituisaun iha minutu 71 hodi hasai Dionizio da Costa (17) no hatama Alito Soares (22).

AS Marca mós halo substituisaun iha minutu 72, hodi hasai Carol Waitila (4) no hatama Amarmando Leite (5) ne’ebé joga iha defeza sentrál.

Tama ba minutu 73, Kablaki FC halo impata ba jogu no skore sai 1-1 hafoin jogadór ne’ebé foin tama Alito Soares (22) marka golu.

Ho golu ne’e, ekipa rua hasa’e tensi jogu no sempre lansa kontra atake ba malu. Tama ba minutu 77, AS Marca hetan penalidade hafoin defeza Kablaki FC Armindo Quintão (2) halo falta hasoru Jogadór adversáriu iha área grandeál laran.

Jogadór AS Marca Octavianus Gonçalves (24) konsege ezekuta penalidade ne’e ho di’ak no muda skore ba 2-1.

Kablaki FC, halo esforsu atu bele halo impata ba jogu ne’e maibé falla. Jogadór AS Marca Ronal Gusmão (23) no Rosário da Cruz (6) tenke simu kartaun kinur iha minutu 88 tanba halo erru iha kampu laran.

To’o jogu termina, AS Marca kontinua lidera ho skore 2-1 no Vitória ne’e lori AS Marca ba lidera provizóriu segunda divizaun époka 2022-2023 ho pontus neen hosi jogu rua ne’ebé ekipa ne’e hala’o ona.

Jornalista: Vito Salvadór