PNTL Detein Joven Na’in-Haat Involve Konfrontu Manleuana

Hatutan.com, (07 Marsu 2023), Dili—Polísia Nasionál Timor Leste (PNTL) Munisípiu Díli, liu hosi Eskuarda Dom Aleixo, detein joven na’in-haat ne’ebé involve iha krime públiku no kria instabilidade iha aldeia Mane-Mesak, Suku Manleuana, Postu-Administrativu Dom-Aleixo, Munisípiu Díli.

Polísia Nasionál Timor Leste (PNTL) Munisípiu Díli, liu hosi Eskuarda Dom Aleixo, detein joven na’in-haat ne’ebé involve iha krime públiku no kria instabilidade iha aldeia Mane-Mesak, Suku Manleuana, Postu-Administrativu Dom-Aleixo, Munisípiu Díli. Foto/PNTL repro.

Komunikadu ne’ebé Hatutan.com asesu, akontesimentu ne’e involve hosi Grupu Arte Marsiál (GAM) hanesan Ikatan Kera Sakti (IKS) ho Persaudaraan Setia Hati Terate (PSHT).

Lee Mós: Polísia Detein Membru GAM Na’in-12 ho Sasan Kro’at

Grupu GAM rua ne’e halo asalta bá malu, tuda-malu iha foho leten, grupu IKS sa’e ba foho leten tuda tesik ba Bairru ne’ebé pertense ba PSHT nune’e provoka tuda malu.

Bainhira Komandante Eskuadra PNTL Dom Aleixo, Inspetór Polísia, Alexandrino da Costa “Samurai”, hetan kontatu hosi fontes servisu sekreta, orienta kedan ekipa patrulla bá to’o kedan foho leten hodi hakalma situasaun.

Bainhira ekipa sa’e ba foho leten, grupu hirak ne’e ho fatuk tuda hasoru membru PNTL, nune’e Ekipa patrulla Dom Aleixo tenke halo prevensaun ho tiru gás lakrimozéniu hodi hafahe grupu rua ne’e.

Iha atuasaun, PNTL konsege kaer suspeitu na’in-haat hamutuk ho evidénsia hanesa  fatuk no ai-tonka ne’ebé sira uza hodi perturba órden públiku.

Joven na’in-haat  ne’ebé PNTL kaer iha fatin akontesimentu ho evidénsia, lori kedan mai halo identifikasaun iha Eskuarda Comoro.

Joven na’in-haat ne’e, na’in-rua PNTL identifika hanesan mambeu hosi organizasaun PSHT ho identidade mak hanesan, ADCM tinan 16 no HS tinan 35, ne’ebé hela iha aldeia Mane Mesak, Suku Manleuana, Postu-Administrativu Dom-Aleixo, Munisípiu Díli.

Na’in-rua seluk, PNTL mós identifika katak pertense bá grupu IKS nian mai hosi bairru seluk ho identidade mak hanesan GADS, tinan 26 no HEM tinan 20, sira na’in-rua hanesan estudante universitáriu ne’ebé hela iha aldeia Mauk, Suku Manleuana, Postu-Administrativu Dom-Aleixo, Munisípiu Díli.

Jornalista: Rogério Pereira Carceres