Estatutu Karreira Professór Pré-Eskolár To’o Ensinu Sekundáriu Aprovadu

Hatutan.com, (08 Marsu 2023), Díli— Konsellu Ministru (KM) aprova ona projetu Dekretu-Lei ne’ebé aprezenta hosi Ministru Edukasaun, Juventude no Desportu, Armindo Maia, ba alterasaun Dekretu-Lei númeru 23/2010, loron 9 fulan-dezembru, ne’ebé aprova Estatutu Karreira Edukadór sira bá Infánsia no ba Profesór Ensinu Báziku no Sekundáriu (Estatutu Karreira Dosente nian), iha Kuarta (08/03/2023).

Reuniaun Konsellu Ministru (KM), Kuarta (08/03/2023). Foto/Elio dos Santos da Costa.

Alterasaun ida-ne’e hakarak atu atualiza Estatutu Karreira Dosente hodi akomoda evolusaun no dezafiu sistema edukativu daudaun ne’e nian iha Timor-Leste, atu fó kontinuidade ba dezenvolvimentu rekursu umanus nasionál, hodi promove kualifikasaun profesór sira nian no atu assegura katak, hirak ne’e tenke koloka tuir nesesidade reál país nian.

Lee Mós: Governu Aprova Dekretu-Lei Estatutu Profisionál ba Pesoál ho Funsaun Polisiál

Hakarak atu hametin valorizasaun karreira liu hosi sistema regulár sira atu halo verifikasaun ka aferisaun ba kompeténsia sira no prevee mekanizmu formasaun no avaliasaun dezempeñu nian ne’ebé bele garante kualidade sistema edukasaun no ensinu nian.

Aleinde ne’e, Dekretu-Lei ida-ne’e determina estabelesimentu sistema rekrutamentu ida ba dosente foun sira liu hosi kriasaun Bolsa Kandidatura sira nian no kria rejime espesiál ida ingresu nian ba profisionál sira edukasaun ne’ebé dedika an ba ensinu no hetan ona abilitasaun mínima ne’ebé Lei haruka hodi bele tama ba karreira.

“Nune’e, alterasaun sira ba Estatutu Karreira Dosente ninia objetivu maka atu garante kualidade ensinu no profesór sira nian, hodi promove meiu sira atu halo selesaun, verifikasaun no kolokasaun hosi rekursu sira, bazeia ba méritu no profisionalizmu, no ho adaptasaun ba nesesidade nasionál sira,” Hatutan.com sita komunikadu.

Ba indivíduu kontratadu sira ne’ebé mak ezerse hela funsaun dosente durante tinan 2023, maibé laiha abilitasaun akadémika mínima ne’ebé presiza atu sai dosente, sei garante oportunidade atu hili kona-bá sira nia futuru, hanesan rekoñesimentu ba sira nia dedikasaun ba sistema edukasaun nasionál nian.

Nune’e, sira bele hili entre kontratu provimentu ba tempu indeterminadu atu ezerse funsaun administrativa ka funsaun apoiu ba dosénsia, ho remunerasaun ekivalente ba Grau D, eskalaun dahuluk, hosi rejime jerál administrasaun públika nian, ka indemnizasaun ida hanesan kompensasaun ba dedikasaun tempu servisu nian, ho valór saláriu ida ba tinan tolu ida-idak iha ne’ebé nia ezerse funsaun sira, tuir períodu kontratasaun ne’ebé rejista ona iha SIGAP.

Jornalista: Rogério Pereira Cárceres