Nasionál
Portadór Defisiénsia 150 Iha Bobonaro Hetan Apoiu Hosi Prezidénsia Repúblika
Hatutan.com, (24 Marsu 2023), Díli—Prezidénsia Repúblika liu hosi Diresaun Inkluzaun Sosiál oferese nesesidade bázika hanesan pakote alimentasaun bá ema ho defisiénsia na’in 150 iha Postu Administrativu Atabae, Maliana, Bobonaro, Lolotoe, Balibo no Cailaco, Munisípiu Bobonaro.
Prezidénsia Repúblika liu hosi Diresaun Inkluzaun Sosiál oferese nesesidade bázika hanesan pakote alimentasaun bá ema ho defisiénsia na’in 150 iha Postu Administrativu Atabae, Maliana, Bobonaro, Lolotoe, Balibo no Cailaco, Munisípiu Bobonaro, 24 Marsu 2023. Foto/Média PR.
Kada Postu Administrativu iha benefisiáriu na’in 25 ne’ebé kompostu hosi ema ho difisiénsia fízika, matan, difikuldade halo komunikasaun no difisiénsia seluk.
Lee Mós: Prezidénsia Repúblika Tulun Família Vulnerável Iha Viqueque, Defisiente Joaninha Husu Uma
Asessór Prinsipal Assuntu Sosiál Unidade Inkluzaun Sosiál, Gaspar Afonso hateten, Xefe Estadu, José Ramos-Horta hakarak promove inkluzaun sosiál liu-hosi kriasaun Unidade Inkluzaun Sosiál hodi tau-matan ba ema ho difisiénsia.
Apoiu nesessidade bázika ida-ne’e, Prezidente Doutór Ramos-Horta nia domin ba ema ho difisiente sira, ida-ne’e la’òs atu rezolve nesessidade hotu-hotu, ida-ne’e lori mai bele apoiu netik ba loron ida ka rua nian, maibé Prezidente Repúblika hakarak promove inkluzaun sosiál,” Hatutan.com sita deklarasaun Gaspar Afonso iha komunikadu.
Assessór Gaspar Afonso fundamenta, konstituisaun RDTL artigu 21 fó garantia ba ema ho difisiénsia atu asesu ba edukasaun no direitu seluk tán hodi bele kontribui ba dezenvolvimentu nasionál.
Nune’e mós Administradór Postu Administrativu Balibó, Amilcar Tavares agradese ba Prezidente Repúblika, José Ramos-Horta, tanba bele fó ona apoiu nesesidade bázika ba ema ho difisiénsia.
Maski udan no estrada la di’ak maibé Gabinete Prezidente Repúblika ho fuan bo’ot, sira-nia domin boot ba rai ida-ne’e liu-liu tau matan bá ema ho defisiénsia.
Autoridade lokál ne’e husu bá benefisiáriu sira atu labele haree kuantidade hosi apoiu ne’e, maibé haree hosi atensaun ba ema ho defisiénsia tanba barak mak seidauk asesu ba programa governu nian.
Reprezentante ema ho defisiénsia, Flávio Noronha lori família no ema ho difisiénsia nia naran agradese ba Prezidente Repúblika, José Ramos-Horta, tanba bele ajuda ona sira liu hosi nesessidade bázika.
Jornalista: Vito Salvadór