Luta Hamutuk Kestiona Atitude Pesoál Membru F-FDTL-PNTL Sadik Malu iha Diskoteka Sira

Hatutan.com, (28 Marsu 2023), Díli-Organizasaun La’ós Governu nian (ONG-sigla Inglés) La’o Hamutuk, kestiona atitude pesoál membru FALINTIL-Forsa Defeza Timor-Leste (F-FDTL) ho Polísia Nasionál Timor-Leste (PNTL) ne’ebé kada fulan simu ona saláriu ho montante $5,00.00 bá leten, maibé kontinua halo problema bá malu tanba hemu tua-lanu iha diskoteka ka fatin karaoke sira.

Lee Mós : Membru F-FDTL ho PNTL Ne’ebé Saláriu Liu $500 Labele Simu Subsídiu $200

Liuhosi programa “Meet The Press” ne’ebé organiza hosi Sekretáriu Estadu Komunikasaun Sosiál (SEKOMS), Tersa (28/3/2023), iha Palásiu Governu,   reprezentante ONG Luta Hamutuk, Augosto Monteiro,  aprezenta preokupasaun ida-ne’e direta bá Ministru Defeza (MD), Filomino da Paixão de Jesus.

Ministru Defeza (MD), Filomino da Paixão de Jesus ho reprezentante ONG Luta Hamutuk, Augosto Monteiro. Foto Repro/Hatutan.com

Augosto Monteiro dehan, foin lalais, mosu dezentendimentu diskute malu ida entre membru PNTL hosi Unidade Espesial Polísia (UEP), Batallão Ordém Públika (BOP) ho membru F-FDTL ida durante hemu tua iha otél ida iha área Fatuhada, Díli.

ONG Luta Hamutuk haree aktu sira ne’e hatudu imajen ida la di’ak hanesan sidadaun Timoroan ida, sá tán membru hosi instituisaun armada no seguransa nian.

La’ós ne’e de’it, Augosto Monteiro kestiona mós kona-bá situasaun instabilidade iha bairru laran sira, dala-ruma membru PNTL ho F-FDTL balu mós hela hotu iha ne’ebá, maibé labele atua situasaun ida ne’e, no ikus mai joven sira halo problema sai boot.

“Ita-nia bairru ne’e rasik mós ita iha polísia mós hela, F-FDTL mós hela, maibé sira ida iha laran ne’e mak problema bebeik, asalta malu, tuda-malu bebeik. Ita iha lejizlasaun lubuk ida kona-bá defeza no seguransa, mas problema mosu beibeik,” Augosto Monteiro kestiona.

ONG Luta Hamutuk konsidera, aktu hirak ne’e mosu, dala-ruma tanba koñesimentu kona-bá lei sira defeza ho seguransa nian sei mínimu, tanba ne’e, presiza fó formasaun bebeik, nune’e bele hasa’e liután sira-ninia kapasidade oinsá akalma situasaun hirak ne’e iha bairu ne’ebé sira hela bá.

Agosto Monteiro mós rekomenda bá Komandu PNTL ho F-FDTL atu aplika sansaun ne’ebé rigorózu bá membru sira ne’ebé sempre komete iha aktu krime sira hanesan ne’e. Sansaun ida mak fó sansaun sosial, katak, uainhira halo sala, haruka oknum sira ne’e halo servisu clener nian iha fatin públiku sira, nune’e bele muda ona sira ninia hahalok.

Hatán bá preukupasaun ne’e, Ministru Defeza (MD), Filomino da Paixão de Jesus dehan, loloos, forsa rua ne’e, tenke haree malu hanesan maun-alin, komplementa ida-idak. Apezar  sira iha subsidiáriadade, katak, ida-idak iha nia tarrefa servisu, komplementariedade.

“Sira-na’in rua iha kualker altura, bele komplementa malu. Agora, ema baku ha’u, ha’u labele see de’it ha’u nia liman karuk. Ha’u nia liman loos mós bele funsiona. Ha’u labele see de’it, tahan de’it hanesan ne’e, ida ne’e, ha’u la book aan. Ita Timor ne’e, la hatene, buat ida tua ne’e, hemu menus ona. Mais hemu tuir oras, tuir tempu. Ida hemu demais ne’e, ida mós bá nia edukasaun, ne’e la fásil,” Ministru Filomino da Paixão de Jesus hatán.

Ministru Filomino dehan, uluk nia sei Brigadeiru Jenerál F-FDTL nian, nia sempre koalia maka’as kona-bá hahalok hosi membru sira ne’e.Ddala-ruma sira ne’ebé halo sala to’o dala-tolu ona, desizaun ikus mak tenke halo demisaun ka sai hosi servisu.

Jornalista: Rogério Pereira Cárceres