Reprezentante Espesiál Kambódia Entrega Trófeu Sea Games bá Ramos-Horta

Hatutan.com, (03 Abríl 2023), Díli—Reprezentate espesiál hosi Komité Organizadora bá Sea Games Kambódia, Hor Sarun, hamutuk ho Embaixadór Kambódia bá Jakarta no mós iha Timor Leste, Iv Heang entrega trófeu Sea Games bá Prezidente Repúblika, José Ramos-Horta iha Palásiu Prezidensiál Bairru-Pité, Segunda (03/04/2023).

Reprezentate espesiál hosi Komité Organizadora bá Sea Games Kambódia, Hor Sarun, hamutuk ho Embaixadór Kambódia bá Jakarta no mós iha Timor Leste, Iv Heang entrega trófeu Sea Games bá Prezidente Repúblika, José Ramos-Horta iha Palásiu Prezidensiál Bairru-Pité, Segunda (03/04/2023). Foto/Média PR.

Prezidente Komité Olimpiku Nasionál Timor-Leste (CONTL), Francisco Kalbuadi Lay ne’ebé akompaña mós reprezentate espesiál ne’e hateten, ohin ne’e ondra tebes nu’udár Komité Olimpiku Nasionál hamutuk ho reprezentante espesiál hosi Komite Organizadora bá Sea Games Kambódia hamutuk ho Emabiaxadór Kambodia ba Jakarta no mós iha Timor Leste mai atu entrega trófeu Sea Games nian ba Prezidente Repúblika.

Lee Mós: Laiha Kaderneta Pasaporte, Atleta Taekwondo Timor-Leste Labele Partisipa SEA GAMES Kambodia

“Aban sei hahú serimónia simbóliku hamutuk ho atleta sira iha Jináji Díli iha tuku 7:00 dadersan lori trófeu ne’e la’o. Trófeu ida-ne’e hahú hosi Kambódia bá nasaun haat,” Francisco Kalbuadi Lay hateten hafoin entrega trófeu ba Xefe Estadu.

Ramos-Horta kongratula ASEAN liu-liu Kambódia hanesan uma-na’in, depois liu tiha tinan 54 foin mak bá dala-uluk Kambódia sai fali uma-na’in ba Sea Games iha sira nia ra’in, entaun sira kontente no ondra tebtebes sira bele to’o mai Timor Leste.

“Xefe Estadu kontente tebtebes bele simu no aban dader Xefe Estadu mós sei partisipa iha serimónia ho atleta sira. Ne’e lá’ós mai konvida de’it ba Komité Olimpiku Sea Games, nune’e mós Paraolimpiku bele ba partisipa iha Kambódia,” Kalbuadi Lay esplika.

Reprezentante Komité Organizadora ba Sea Games Kambódia, Hor Sarun hateten, delegasaun Kambódia ne’ebé mai Timor-Leste lori ho troféu Sea Games ne’e hanesan mós reprezenta hosi Komite Organizadora ba Sea Games Kambódia mai kumprimeta Prezidente Repúblika, José Ramos-Horta no konvida atu aban bele partisipa iha Torch Relay Sea Games 2023.

“Ami kontente no sente onradu tebes ohin mai iha ne’e no hasoru Prezidente Repúblika José Ramos-Horta atu bele partisipa iha Torch Relay Sea Games Kambodia 2023,” Hor Sarun hateten.

Antes ne’e Torch Relay Sea Games Kambódia 2023 ne’e hala’o ona iha nasaun tolu hanesan Vietname, Filipina no Indonézia.

Iha Sea Games Kambódia ba dala-XXXII ne’e, Timor-Leste sei partisipa ho atleta hamutuk 54 ne’ebé mai hosi modalidade sira hanesan Taekwondo, Futeból, Boxe, Volly Praia, Karatedo no Atletizmu.

Jornalista: Vito Salvadór