Ermera
Hadi’a Estrada Kotu Iha Ermera, Fulan Ida De’it Difísil
Hatutan.com, (04 Abríl 2023), Díli—Prezidente Autoridade Munisípiu Ermera, Eusébio Salsinha koordena ona ho na’in bá kompañia nasionál rua hanesan Monte Veado no Montana Di’ak atu halo normalizasaun bá estrada sira ne’ebé kondisaun aat gráve no kotu iha Ermera durante udan iha semana kotuk, maibé difísil atu hadi’a iha fulan ida nia laran.
Prezidente Autoridade Munisípiu Ermera, Eusébio Salsinha.
“Lakleur tán ita bá ona eleisaun, konserteza atu transporta ekipamentu sensitivu sira bele fásil liu, tanba estrada bá Raimerheu kotu no Hatulia mós kuaze kotu hotu. Ita aselera atu normaliza de’it, labele hadi’a tanba atu hadi’a ne’e iha fulan ida de’it ne’e, difísil tanba infra-estrutura sira ho kondisaun gráve no nia implikasaun kustus ne’e boot tebtebes,” Eusébio Salsinha hateten hafoin asiste serimónia posse bá funsionáriu foun Bombeirus nian, iha Sentru Formasaun Polísia, Comoro, Tersa (04/04/2023).
Lee Mós: Motorista Sira “Halerik” Ho Kondisaun Estrada Gleno-Letefoho-Atsabe
Eusébio Salsinha rasik submete ona karta bá Diresaun Jerál sira iha Ministériu Obras Públikas (MOP) no daudaun ne’e destaka ona Institutu Jestaun no Ekipamentus (IJE).
Oras-ne’e daudaun mós MOP loke ona tenderizasaun hodi selesiona kompañia rua atu normaliza fali dalan sira ne’e.
“Iha Kompañia rua maka Monte Veado ho Monatana Di’ak mak autoridade sira identifika hodi normaliza estrada sira ne’ebé aat no kotu iha Ermera. Kompañia lokál laiha meius, laiha ekipamentu pezadu,” Eusébio Salsinha hateten.
Prezidente Autoridade ne’e mós esforsu hodi kria tán dezeñu Bill of Quality (BOQ) bá ponte sira mak durante sei aat iha área rurál atu bele hetan apoiu fundu kontijénsia nian ruma nune’e bele normaliza fali.
Ponte Neen Mak Kotu
Eusébio Salsinha informa, durante udan ho intensidade boot iha semana kotuk, rezulta ponte hamutuk neen mak kotu iha Ermera. Tanba ne’e maka daudaun ne’e intervensaun bá normalizasaun estrada sira ne’e la’o namanas iha terrenu.
“Ponte neen mak hotu iha área sira Ermera nian. Intervensaun hala’o tiha ona. Ne’e ita halo liuhosi alternativa de’it labele loke fali dalan foun tanba ne’e problema,” Eusébio Salsinha informa.
Dalan alternativu ne’e maka, hanesan bá Ermera la di’ak, hadi’a fali dalan Beluli, dalan ne’e diretamente sa’e bá Ermera.
Kona-bá Letefoho nian bá la di’ak, nia lebele liuhosi kruzamentu Ermera, entaun tenke sa’e hosi Suku Riheu nian, tenke normaliza ida ne’e atu transporte públiku bele bá nafatin Letefoho, Atsábe, bele asesu.
Kona-bá estrada sira ne’ebé mak kondisaun hahú aat iha kapitál Gleno iha ona emprezáriu Ermera oan sira mak fó sira-nia apoiu gratuita.
“Sira dehan, ne’e ami halo de’it lalika selu, kombustível mós lalika tau. Basta ita-boot fó orientasaun mai ami. Ne’ebé, iha sidade laran sira normaliza, kuak sira bá taka tutuir no ne’e CCI-TL mak koordena, sira koopera di’ak tebtebes,” Eusébio hateten tán.
Prezidente Autoridade ne’e garante katak, molok kampaña no eleisaun Parlamentár iha fulan-Abríl nia klaran bá to’o fulan-Maiu bele konklui ona, nune’e fasilita órgaun eleitorál CNE ho STAE, transporta materiál sira bá eleisaun nian la’o ho di’ak no seguru.
Jornalista: Rogério Pereira Cárceres