PNTL Tenke Asegura Eleisaun Parlamentár no Intervén Bainhira Iha Violasaun Bá Órden Públika

Hatutan.com, (05 Abríl 2023), Díli—Prezidente Repúblika (PR), José Ramos-Horta husu bá Polísia Nasionál Timor-Leste (PNTL) tenke garante órden públiku no halo intervensaun baibhira iha violasaun ruma durante kampaña eleisaun Parlamentár to’o loron votasaun no anúnsiu rezultadu.

Komandante Jerál PNTL, Komisáriu Hendrique da Costa fó kontinénsia bá PR José Ramos-Horta. Foto/Elio dos Santos da Costa

“Husu PNTL atu garante de’it órden públika no prevene violénsia. Tenke halo intervensaun baibhira iha violasaun ba Lei órden públika,” Prezidente Repúblika, José Ramos-Horta hateten hafoin hala’o enkontru ho Komandante Jerál PNTL Hendrique da Costa iha Palásiu Prezidensiál Nicolau Lobato Bairru-Pité, Kuarta (05/04/2023).

Lee Mós: Númeru Sorteiu Partidu Polítiku Sira Iha Eleisaun Parlamentár 2023

Durante enkontru, Komandante Jerál PNTL atualiza hela informasaun balun bá Xefe Estadu kona-bá preparativu ne’ebé PNTL no hosi FALINTIL Forsa Defeza Timor Leste (F-FDTL) atu halo bá eleisaun Parlamentár.

Buat ne’ebé PNTL no F-FDTL presiza, Xefe Estadu sei apoia 100% tanba institutusaun rua ne’e tenke garante liu hosi medida prevensaun didi’ak atu labele iha violénsia.

PNTL ho F-FDTL servisu hamutuk, iha koordenasaun ho STAE-CNE ho autoridade sira munisípiu atu bele lori susesu ba eleisaun Parlamentár 2023.

“Ha’u aviza ba autoridade sira munisípiu nian. Ha’u lakohi haree Prezidente Munisípiu ruma, administradór, Postu Administrativu ruma buka ameasa ema, viola lei, ha’u aviza kedan ho PNTL, Xefe Estadu tau-matan besik loos, metin loos komportamentu autoridade sira iha munisípiu, di’ak liu autoridade munisípiu se hakarak defende sira nia fatin, hakarak kontinua servisu di’ak liu la mete partidarizasaun,” Xefe Estadu apela.

Iha fatin hanesan, Komandante Jerál PNTL, Komissáriu Jerál Polisia Henrique da Costa hateten, nia ho segundu Komandante mai hasoru Prezidente Repúblika, hodi halo tuir konvite Xefe Estadu nian, atu informa kona-bá situasaun seguransa nian no preparasaun seguransa nian ba iha períudu kampaña no mós eleisaun ninian.

PNTL hahú kedan preparasaun iha fulan hirak ba kotuk, hahú ho treinamentu ba membru PNTL sira ne’ebé iha terrenu liu-liu ba ekipa forsa rezerva iha munisípiu 14, treinamentu ne’e sei remata iha loron 17 fulan Abríl.

Hala’o ona enkontru ho Komandante munisípiu sira,  Komandante unidade,  xefe departamentu sira, ba Superiór sira hodi fó orientasaun oinsá bele hala’o servisu hamutuk ho parseiru sira iha munisípiu, iha terrenu.

“Ita  halo ona semináriu loron rua ba Komandante munisípiu, unidade sira no mós hetan matéria aprezentasaun hosi CNE no STAE. Buat sira ne’e la’ós foun, maibé iha eleisaun sira ba kotuk ita hala’o liu hosi medida sira ne’e atu eleva tán koñesimentu PNTL nian ba atendimentu iha terrenu,” Henrique da Costa hateten.

“Ita iha duni insidente no asidente ruma. Horisehik iha asidente ne’ebé akontese iha munisípiu Liquiçá,  ita nia joven ida lakon vida. Ne’e tanba dalaruma iha erru umanu ninian, dalaruma ita la kuidadu, ita haree dalaruma kondisaun no situasaun ne’e la presiza atu ultrapasa, tanba ita laiha dalan, asidente ne’e mosu,” nia informa.

Husu nafatin ba motorista sira, ema hotu ne’ebé uza estrada públiku kontinua kumpre Lei Tránzitu ninian, Kódigu Estrada no ema ida-idak mós tenke kuidadu vida.

Jornalista: Vit Salvadór