Task Force 100 Partisipa Treinamentu Atua Kríme iha Ámbitu Eleisaun Jerál 2023

Hatutan.com, (10 Abríl 2023), Díli-Polísia Nasionál Timor-Leste (PNTL) Munisípiu Díli hahú halo treinamentu bá membru task force na’in-100 hodi prepara bá atua kríme eleitóral sira ne’ebé mak karik mosu durante atividade kampaña polítika to’o eleisaun parlamentár, 21 fulan-Maiu 2023.

Lee Mós : UEP Sei Destaka Membru Iha Sentru Votasaun Ne’ebé Konsidera Poténsia Bá Konflitu

Komandante PNTL Munisípiu Díli, Superentendente Xefe Polísia Natercia Eufrásia Soares Martins dehan, treinamentu uza forsa ne’e tenke dixiplina, katak bazeia de’it bá regra no lei sira mak vigóra iha Timor-Leste.

Komandante PNTL Munisípiu Díli, Superintendente Xefe Polísia Natércia Eufrasia Soares Martins. Foto/Elio dos Santos da Costa

“Sira sei partisipa iha treinamentu ho disiplina durante semana ida, oinsá uza forsa para atua situasaun bainhira halo sira-nia servisu durante eventu kampaña no eleisaun parlamentár 2023,” Superintendente Xefe Polísia Natercia Soares hateten, Segunda (10/4/2023), iha kuartel Unidade Espesiál Polísia (UEP), Díli.

Nia hateten, 2023 nu’udár tinan politika bá Povu Timor-Leste, atu hili sira-ninia reprezenta povu iha Parlamentu Nasionál no Governu foun, tanba ne’e, atu asegura prosesu eleitóral sira ne’e tomak ho susesu, PNTL hahú kedan ona nia preparasaun bá treinamentu fíziku hodi oinsá mak membru sira komprende atu utiliza regra sira uza forsa nian.

Natércia hateten,  tinan politika ida ne’e obriga no ejíze duni PNTL ninia preparasaun fízika sira, hodi asegura atividade kampaña no eleisaun bele la’o ho di’ak ho susesu, no estabiliza nafatin estabilidade iha rai-laran.

PNTL sempre preparadu hasoru situasaun saida de’it, atu treina ka la treina mós, polísia preparadu, tanba ida-ne’e duni mak PNTL ninia misaun.

Komandante UEP, Superentendente Xefe Polísia Orlando Gomes esplika, treinamentu fízika ne’e, fasilita hosi UEP hodi oinsá membru PNTL sira bele asegura no atua situasaun sira ne’ebé akontese iha kampaña no eleisaun.

“UEP mós iha ona planu operasaun  no ami hahú hahú identifika fatin risku bá konflitu sira hosi munisípiu 13, inklui RAEOA. Ami hein diretiva hosi Komandu Operasaun Nasionál para ajusta hodi ita  hahú destaka ita-nia membru bá fatin sira ne’e,” Superentendente Xefe Polísia Orlando Gomes hateten.

Iha fulan-Fevereiru 2023, Unidade Espesial Polísia (UEP) liuhosi Korpu Segurança Pesoál (CSP, sigla portugés) hala’o tiha uluk treinamentu hodi fó asisténsia seguransa bá lider partidu politiku sira na’in-17 durante atividade kampaña polítika, hosi loron 19 fulan-Abríl to’o loron 18 fulan- Maiu 2023.

Jornalista: Rogério Pereira Cárceres