Embaixadór Shin Mantaek Konvida Xefe Estadu Partisipa JEJU Forum Korea Súl

Hatutan.com, (11 Abríl 2023), Díli—Embaixadór Korea do Súl iha Timor-Leste, Shin Mantaek konvida Prezidente Repúblika (PR), José Ramos-Horta hodi partisipa iha JEJU Forum ne’ebé sei hala’o iha Korea do Súl.

Embaixadór Korea Súl iha Timor Leste, Shin Mantaek hala’o enkontru ho Xefe Estadu, Ramos-Horta iha Palásiu Prezidensiál Nicolau Lobato Bairru-Pité, Tersa (11/04/2023). Foto/Média PR.

Alende ne’e, Xefe Estadu mós sei hala’o enkontru bilaterál ho Prezidente Korea Súl nian ne’ebé tuir planu sei akontese iha ámbitu JEJU Forum ne’e rasik.

Lee Mós: Shin Mantaek Husu TL Apoia Kandidatura Korea Súl bá Nasaun Membru UNSC

“Ha’u mai informa ba Prezidente Repúblika, José Ramos-Horta katak Korea do Súl konvida eselénsia atu partisipa iha JEJU forum iha Korea Súl nian,” Embaixadór Shin Mantaek hateten hafoin enkontru ho Xefe Estadu iha Palásiu Prezidensiál Nicolau Lobato Bairru-Pité, Tersa (11/04/2023).

Prezidente Repúblika mós liu hosi enkontru ohin espressa ninia disponibilidade atu partisipa iha JEJU Forum.

“Eselénsia dispobiliza katak, onradu ida ba nia atu partisipa iha JEJU Forum iha Korea Súl,” nia esplika.

Assuntu seluk ne’ebé Embaixadór Shin Mantaek ko’alia ho Xefe Estadu maka informa mós kona-bá apoiu hosi kompañia Samsung ne’ebé fó sasán balun ba iha Prezidénsia Repúblika no ohin mós aproveita oportunidade hodi mai diskuti atu oinsá bele halo serimónia entrega ba prezidénsia.

Partilla informasaun balun kona-bá Korea ninia apoiu ba Timor-Leste liu-liu ba iha programa kapasitasaun rekursu umanu ho detallus, fahe ba eselénsia kona-bá saida mak Korea sei apoia Timor-Leste ninia preparasaun atu sai full membership ASEAN.

Prezidente Repúblika, José Ramos-Horta hato’o pedidu ida atu governu Korea Súl liu hosi embaixada iha Timor-Leste bele iha posibilidade hodi bele apoia fasilidade saúde ba iha klínika balun iha Díli, hodi bele mellora sistema saúde.

“Ami lori traballu ida-ne’e sei diskuti ho parte Korea nian, haree possibilidade saida mak ami bele halo, ami sei informa fali mai eselénsia,” Embaixadór ne’e promete.

Korea Súl komprometidu nafatin atu la’o hamutuk ho Timor-Leste iha tempu agora no ba oin, atu akompaña hodi fó asisténsia ne’ebé nesessáriu ba dezenvolvimentu Timor-Leste nian.

Jornalista: Vito Salvadór