Partisipasaun Prezidente Repúblika iha serímonia agradesimentu ne’ebé hatudu mós kaudru partidu CNRT ho atributu partidu CNRT nian iha Munisípiu Baucau ne’e konsege viral iha mídia sosiál Facebook no hamosu espekulasaun polítiku oioin. Balun, dehan, Prezidente Repúblika viola ona Konstituisaun no balun fali akuza Prezidente Repúblika hatudu nia an hanesan ema partidu CNRT nian.
Prezidente Repúblika, José Ramos-Horta hateten, públiku la kestiona nia atividade agradesimentu ne’e, maibé parte balun de’it ne’ebé mai ho intensaun polítika ka polítiku balun mak kestiona.
Advertisement
“Ha’u la bá kampaña, ha’u bá vizita Baucau tamba ha’u iha apoiante barak iha Baucau, desde iha ha’u nia primeiru mandatu Prezidente Repúblika iha Baucau-Laga apoiantes barak no ha’u maka hakarak bá tamba tinan ida besik ona, há’u la ba agradese sira,” Prezidente Repúblika José Ramos-Horta hatán jornalista sira iha Sentru Konvensaun Díli, Tersa (11/04/2023).
Xefe Estadu sublina enkontru iha Baucau la’ós bolu konsolidasaun partidu CNRT nian, sira halo agradesimentu, maibé maun bo’ot Kay Rala Xanana Gusmão mós la mosu iha ne’ebá tamba iha ne’ebá iha ema hosi partidu FRETILIN, PLP no mós partidu sira seluk ne’ebé durante kampaña fó apoiu bá nia iha eleisaun Prezidensiál.
“Polítiku balun mak preokupa no kestiona hau nia prezensa iha Baucau bá halo saida? Keta ba doko karik sira nia knuuk iha ne’ebá, maibé atu hateten buat loos katak há’u bá agradese de’it apoiantes sira, pasiar iha vila laran, sosa komunidade sira nia produtu modo, ai-fuan iha zona aeroportu nian para kareta no sosa produtu komunidade sira nian no nakonu iha karreta kiik ne’e,” Ramos-Horta hateten.
Kona-bá karreta estadu hosi Palásiu Prezidensiál ne’ebé tula atributu partidu CNRT, Xefe Estadu hateten, nia haree ona iha video ida, iha kamizola oan rua ka tolu iha karreta laran no nia mós haree iha video seluk ida partidu KHUNTO nian ho karreta Estadu halo kampaña.
Ramos-Horta afirma oorientasaun klaru no halo tiha ona, se mak viola regra patrimóniu Estadu bá kampaña ka privadu sei responsabiliza no sei fó sansaun.