Hatutan.com, (12 Abríl 2023), Díli—Governu liu hosi Reuniaun Konsellu Ministru (KM), aprova ona projetu Dekretu-Lei, aprezenta hosi Vise-Primeiru-Ministru no Ministru Planu no Ordenamentu, ne’ebé aprova Planu Nasionál Ordenamentu Territóriu (PNOT-TL).
PNOT- TL ne’e hanesan ezersísiu dahuluk hosi planeamentu territoriál bá nível nasionál ne’ebé realiza ho enkuadramentu legál no institusionál ne’ebé adekuadu, haree promosaun bá modelu ida dezenvolvimentu nasionál sustentável no inkluzivu.
Lee Mós: KM Autoriza Ministru Rui Gomes Asina Akordu Subvensaun Públiku Millaun $37,5 Hosi JICA ba Projetu Aeroportu Comoro
“Planu ne’e sei aplika bá territóriu tomak Timor-Leste nian, inklui Rejiaun Administrativa Espesiál Oecusse Ambeno (RAEAO) no illa sira Ataúru no Jako, ho área ida-ne’ebé hamutuk 14.919 km² no governa hosi prinsípiu sira partisipasaun nian, subsidiariedade, prevensaun, prekausaun, ekuidade ka solidariedade sosiál, no efisiénsia ambientál no sosiál,” Hatutan.com sita komunikadu, Kuarta (12/04/2023).
Sei Propoin medida planeamentu 61 no asaun sira hamutuk 117 ne’ebé sei implementa iha domíniu lima:
1) ambientál;
2) rede urbana no povoamentu rurál;
3) produtivu;
4) infraestrutura no ekipamentu sira; no
5) institusionál no organizasionál.
PNOT-TL ne’e hanesan instrumentu dezenvolvimentu territoriál ida-ne’ebé estabelese ba opsaun boot sira hodi organiza territóriu nian, ho objetivu atu promove dezenvolvimentu integradu ida, armoniozu no sustentavel ba país, atu garante koezaun territoriál no atu hamenus asimetriál territoriál sira.
Ho objetivu mós atu haforsa territóriu hanesan fatór integradór ba polítika sira setoriál nian no orienta polítika territoriál eskala ki’ik sira.
Planu Nasionál Ordenamentu Territóriu nian sei konstitui hanesan instrumentu-xave hodi estabelese sustentabilidade ba baze sira dezenvolvimentu sosiál, territoriál no ekonómiku Timor-Leste nian, promove integrasaun setór sira hanesan saúde, edukasaun, komunikasaun, transporte sira, ba enerjia no ba ekonómika nasionál, hadi’a sistema dezenvolvimentu urbanu no rurál, ba nivel nasionál, munisipál no lokál, ho konsiderasaun ba dimensaun ambientál.
Jornalista: Rogério Pereira Cárceres
