CI Sei Haruka Karta Bá STAE-CNE Fasilita Jornalista Vota Móvel

Hatutan.com, (19 Abríl 2023), Díli—Conselho Imprensa (CI) sei haruka karta bá Órgaun eleitorál hanesan Sekretariadu Tékniku Administrasaun Eleitorál (STAE) ho Comissão Nacional das Eleições (CNE) atu fasilita jornalista hosi média nasionál sira hodi vota móvel iha eleisaun Parlamentár 2023.

Membru CI hala’o konferénsia imprensia iha Kintal-boot Díli, Kuarta (19/04/2023).

“CI sei haruka karta ofisiál hodi husu bá órgaun eleitorál STAE no CNE atu tau atensaun makás liu bá iha servisu ne’ebé jornalista sira halo, liuliu iha prosesu eleitorál hosi kampaña to’o votasaun to’o formasaun guvernu. Tenke fasilita jornalista sira atu vota móvel,” Konsileiru Espedito Dias Ximenes hateten liu hosi konferénsia imprensia iha Kintal-boot Díli, Kuarta (19/04/2023).

Lee Mós: Lei Mak Haruka Jornalista Bá Vota Iha Fatin Rejistu Eleitorál

CI ezije ba STAE ho CNE atu fó oportunidade bá jornalista sira hodi vota móvel hanesan eleisaun Prezidensiál tinan kotuk, bainhira jornalista ida halo kobertura iha fatin ida, nia tenke vota duni iha fatin ne’ebe nia halo kobertura.

Ejizensia ne’e tanba CI hakarak fó advokasia no defende direitu jornalista sira nian, iha sira nia servisu jornalistiku, oinsa sira bele vota hanesan sidadaun iha fatin ne’ebé sira halo kobertura.

“Iha deklarasaun diretór jerál STAE nian laiha konsisténsia. Iha semana rua liu ba deklara katak média públiku sira de’it mak bele vota livre ka vota móvel. Maibe horisehik muda fali katak la iha ida mak vota móvel,” nia hateten.

CI sei nafatin luta makás atu bele ajuda no defende direitu jornalista atu vota livre ba iha fatin ne’ebé halo kobertura.

CI kestiona mós katak, tanba saida mak observadór nasionál sira hanesan ONG ida nia bele vota livre, halo observasaun iha estasaun votasaun sira nia bele vota livre, maibé jornalista labele.

CI mós apela ba jornalista hotu kaer metin matadalan ne’ebé iha, respeita kódigu étika jornalista, durante kobertura atu hatudu nafatin imparsialidade iha publikasaun sira.

Iha fatin hanesan, konseleiru Francisco Belo Simões fó hanoin mós ba jornalista sira atu kontinua kumpre kódigu étika jornalista nian, bainhira halo kobertura iha eleisaun Parlamentár nune’e labele hatudu konfuzaun ba públiku katak labele halis ba partidu ida ka halis ba lider partidu balun, imparsialidade ne’e importante.

“Husu jornalista sira ne’ebé halo live streaming liuliu média sosiál sira atu labele viola kódigu étika tanba dalaruma ita halo live streaming ita la atentu ho didi’ak, bele hamosu disturbiu, hatutan mensajen sira ne’ebé provokativu, evita atu halo publikasaun ba deklarasaun de ódiu no rasismu ,” Francisco Belo Simões husu.

Jornalista Estajiáriu: Lazaro Pereira Quefi