PDC Hakarak Halakon Pensaun Vitalísia

Hatutan.com, (21 Abríl 2023), Díli— Partido Demokrata Cristão (PDC), iha programa lima ptioridade atu implementa bainhira hetan fiar maioria hosi povu iha Parlamentu Nasionál no kaer Governu, ida maka hakarak halakon pensaun vitalísia ne’ebé konsidera hamosu injustisa iha nasaun ne’e.

PDC hala’o mini kampaña iha suku Nunumoge, postu administrativu Hatu–Builico Munisípiu Ainaro, Kuarta (19/04/2023). Foto/PDC.

Durante komísiu polítika iha mini kampaña ne’ebé hala’o iha suku Nunumoge, postu administrativu Hatu–Builico Munisípiu Ainaro, Kuarta (19/04/2023), Prezidente Partidu PDC Francisco de Araújo konsidera katak, Pensaun Vitalísia presiza hasai duni tanba habokur de’it elite polítiku sira.

Lee Mós: Xanana Promete CNRT Ukun Halo Buat Rua bá Nasaun ho Povu

“Kada tinan gasta osan Estadu bo’ot maibé osan ne’e ba de’it lider politiku sira iha Parlamentu Nasionál no haluhan tiha povu nia nesesidade hanesan, estrada, bee-moos, eletrisidade, agricultura. Povu terus nafatin de’it no lider sira mak bosu. Bainhira PDC kaer ukun sei halakon tiha pensaun vitalisia,” nia hateten.

Programa daruak maka iha tinan lima mai sei tau prioridade ba povu nia moris liu hosi hadi’a seitór agrikultura.

Seitór agrikultura mak esensiál tebes no presiza duni atu bele tau atensaun másimu hodi investe iha hasa’e produsaun rai laran liu hosi halo modernizasaun, hahú no halo mákina sira ne’ebé mak bele kuda no koilleta rasik, tanba PDC haree katak, agrikultór sira agora daudaun sei servisu manuál.

Programa datoluk maka,  PDC sei tau prioridade ba hadi’a fatin turizmu sira ne’ebé mak bele kontribui reseita ba Estadu.

“Ita hatene fatin turizmu hanesan Na’in Feto Ramelau hanesan fatin di’ak ida, hanesan mós fatin istóriku, fatin ne’ebé religiozu no abandonadu.  Sei hadi’a fatin turizmu Kristu Rei, fatin di’ak ida maibé abandona ema tama estraga la iha kontrolu,” nia subliña.

Programa dahaat maka, PDC mai ho lideransa foun no mileniál, hakarak muda sistema ne’ebé mak ladún di’ak no koko atu hadi’a.

Programa dalimak maka, sei hadi’a infra estrutura ne’ebé ohin loron sei kontinua hakdasak iha territóriu tomak hanesan estrada.

Iha fatin hanesan Vise Prezidente Partido PDC, Domingos da Costa reforsa katak, bainhira hetan asentu iha PN no kaer Governu sei hadi’a uluk estrada liga bá Maubise ho Hatu–Builico.

Tanba ne’e, husu koordenadór Munisípiu to’o suku no aldeia atu sérvisu makaas hodi Lori vitória ba PDC nune’e bele hetan asentu iha parlamentu Nasional.

Hafoin mini kampaña iha Hatu-Builico, ekipa Partidu PDC kontinua hala’o Mini Diálogu iha aldeia Lia Huu Suku Ai-Tutu.

Iha mini kampaña no diálogu ne’ebé Partido PDC hala’o iha aldeia Lia Huu Suku Ai-Tutu ba loron daruak ne’e hetan observasaun hosi Comissão Nasionál Eleições (CNE), PDHJ, no hetan mós seguransa hosi PNTL.

Jornalista: Vito Salvadór