Manufahi
Alkatiri: Ikus-Ikus Ne’e Governu Sai Fali Hanesan Bazar
Hatutan.com, (22 Abríl 2023), Manufahi-Sekretáriu jerál partidu Frente Revolusionáriu Timor-Leste Independente (FRETILIN), Marí Alkatiri, nota katak ikus-ikus ne’e mós Governu sai fali hanesan bazár. Nune’e, partidu ida lori ninia ema barbarak bá tama iha ne’ebá la’ós tanba méritu maibé tan de’it pertense bá partidu ida.
Lee Mós : FRETILIN Promete Estrada bá Populasaun Rotuto
Brigada CNE halo supervizaun bá komisiu polítika partidu FRETILIN iha Manifahi, Sábadu (22/4/2023). Foto/Rogério Cárceres
Prezidente lideransa Troika FRETILIN ne’e observa mós katak, ikus-ikus ne’e, deputadu sira iha Parlamentu Nasionál (PN) buka de’it atu hatuun malu. La buka atu hetan intendimentu atu bele dudu rai ne’e bá oin. Tanba ne’e, tuir Alkatiri, bainhira Fretilin fila bá ukun, hakarak hadi’a uluk Estadu no kombate Korrupsaun Koluzaun ho Nepotizmu (KKN).
“FRETILIN bainhira ukun, hakarak halo saida? Ukun hakarak hadi’a. hadi’a saida, hadi’a uluk Estadu. Estadu agora ne’e, narnaran de’it. Hosi liur mak manda fali bá prezidente. Ne’e ha’u bolu podér informál,” Mari Alkatiri hateten durante intervensaun iha komísiu daruak partidu FRETILIN nian iha Kampu Futebool Ailuli, Suku Letefoho, Postu Administrativu Same Vila, Munisípiu Manufahi, Sábadu (22/04/2024).
Tuir nia, FRETILIN hakarak ukun, tanba hakarak hadi’a estadu, no tuir nian, estadu instituisaun ida ne’ebé boot liu iha rai hothotu. Labele partidu ida iha estadu nia leten, signifika, labele mós ema ida hakarak iha estadu nia leten.
“Ne’e mak bolu vida institusionál ka kultura institusionál. Tanba ne’e, hadi’a estadu,” Alkatiri afirma tán.
Sekjer FRETILIN ne’e esplika, estadu ne’e, iha ninia órgaun ka ai-riin haat, prezidente repúblika, parlamentu nasional, governu, no tribunál. Ai-riin haat ne’e, ida-idak iha nia kompeténsia. Governu ho parlamentu, importante tebes, tanba funsaun governu nian, atu hametin unidade. Uainhira laiha unidade, laiha dezenvolvimentu. Laiha unidade, laiha progressu. Funsaun governu nian, liga bá parlamentu, parlamentu liga bá governu. Ida ne’e mak Fretilin hakarak.
“Governu tenke hametin unidade para bele iha dezenvolvimentu, bele iha progressu. Signifika, Governu tenke ninia baze mak ne’e, meritokrásia no la’os KKN,” Mari Alkatiri hateten.
Alkatiri hatutan, dadaun ne’e, Fretilin viabiliza Governu ida no ho viabilizasaun Fretilin nian bá Governu ida-ne’e sira (plataforma) agora mesak de’it, liu ona maiória absoluta.
Komísiu partidu FRETILIN nian iha Kampu Futebol Ailuli, Suku Letefoho, Postu Administrativu Same Vila, Munisípiu Manufahi, Sábadu (22/04/2024). Foto/Rogério Cárceres
FRETILIN hamutuk ho Partidu Libertasaun Populár (PLP) ho Kmanek Haburas Unidade Nasionál Timor Oan (KHUNTO) iha kadeira 36 no ida-ne’e mak bolu Plataforma intendimentu nian.
“Plataforma ida ne’e, sé ita ida-idak ho ninia númeru kadeira, laiha tán ida atu mai sobu ita. Maibé, ha’u iha fulan neen mak la’o hale’u Timor-Leste, tun bá suku, aldeia, bá knua, no ha’u sente katak, Fretilin mesak, sei aumenta, no kadeira barak. Tanba ne’e, ita hahú di’ak ona, maibé, ita tenke Serviu nafatin para atu aumenta,” Alkatiri hateten.
Iha biban ne’e, lideransa Troika FRETILIN, Titó Cristóvão da Costa “Lere Anan Timur” hatutan, sé Fretilin ukun, prontu no brani atu kombate mós korupsaun.
FRETILIN mak ukun, sei kombate buat ida familiarizmu ne’e. Fretilin tenke fó ukun bá ema ida-idak tuir ninia matenek. La’os taka matan, fó de’it.
“La signifika katak, pure-zemplu, Same-Manufahi na’in-rua tolu, iha gabinete ida. Tuir nia servisu, tuir nia matenek. Sé nia lori kilo 5, entaun, fó kilo 5 nia lori. Ita labele naran fó liu kilo, ne’e oras ida,mate. Ema barak, hanoin mak kadeira, osan, fó bá malu,” Lare Anan Timur hateten.
Komísiu FRETILIN nian ne’e hetan supervizaun hosi Ofisial sira Comissão Nacional de Eleições (CNE) no asegura másimu hosi membru Polísia Nasional Timor-Leste (PNTL) Munisípiu Manufahi.
Jornalista: Rogério Pereira Cárceres