FRETILIN Promete Estrada bá Populasaun Rotuto

Hatutan.com, (22 Abríl 2023), Díli-Sekretáriu jerál partidu Frente Revolusionáriu Timor-Leste Independente (FRETILIN), Marí Alkatiri promete  bá populasaun Suku Rotuto, Postu Administrativu Same Vila, Munisípiu Manufahi, hadi’a estrada bá Rotuto bainhira povu vota bá FRETILIN iha eleisaun parlamentár, 21 fulan-Maiu 2023.

Lee Mós : Iha Loron Idul Fitri, Marí Alkatiri Apoia Matérial Konstrusaun bá Sentru Juventude Katólika Daisoli

“Ha’u mai, tuir dalan Rotuto nian, ha’u hakfodak, tanba haree estrada ne’e nia kondisaun ne’ebé aat tebes. Bainhira FRETILIN fila bá ukun, ami sei la haluha ida ne’e,” Sekretáriu jerál FRETILIN, Marí Alkatiri hateten, durante diálogu aberta ho komunidade sira iha Sede Suku Rotuto, Sábadu (22/04/2023).

Partidu FRETILIN halo diálogu aberta ho komunidade sira iha Sede Suku Rotuto, Sábadu (22/04/2023). Foto/Rogério Pereira Cárceres

Marí Alkatiri nia prezensa iha Rotuto atu kumpri de’it devér nu’udár fundadór bá nasaun Repúblika Demokrátika Timor-Leste (RDTL) nian. Nia dehan, uluk, bainhira sira harii FRETILIN, hanesan uma-lisan povu Timor-Leste tomak nian.

“Kompromísiu  ami asume, hamutuk ho Nicolau Lobato, Francisco Xavier do Amaral, ho sira seluk tán. Kompromísiu mak ida ne’e-duni, atu liberta pátria, no liberta povu, kore povu,” Alkatiri hateten.

Iha okaziaun ne’e, Alkatiri husu kontribuisaun autoridade lokál sira atu servisu hamutuk bá susesu eleisaun parlamentár, tinan ne’e, tanba FRETILIN manán, povu mak manán.

Hasoru Problema Sosiál Barak

Dezde Timor-Leste restaura nia ukun aan iha 20 fulan-Maiu 2002, populasaun Rotuto enfrenta problema sosial barak iha sira-ninia suku laran.

“Ami nia problema boot mak infraestrutura bázika, hanesan estrada, eletrisidade no bee-moos,” Xefe Aldeia Fatuhei, Romeu dos Santos, haktuir.

Reprezentante autoridade komunitáriu ne’e husu Governu liuhosi ministériu kompetente atu bá kanaliza uza de’it kanu-bessi, nune’e, bele sulin di’ak bá komunidade.

Kona-bá eskola, to’o oras ne’e kondisaun eskola EBC Haburas Hatuhei, aat ona, no oras ne’e sei paradu. Razaun eskola ne’e la uza ona, tanba kondisaun lahuk ona, no depois ema barak mak deside fila bá hela iha Same Vila, ikus mai, populasaun menus.

Partidu FRETILIN halo diálogu aberta ho komunidade sira iha Sede Suku Rotuto, Sábadu (22/04/2023). Foto/Rogério Pereira Cárceres

Kona-bá Saúde, bele dehan sufisiente, maibé, presiza konstrui tán uma ho dapur bá parteira sira, nune’e, uainhira médiku ruma mak destaka iha ne’ebá, bele utiliza hodi fó atendimentu saúde ida di’ak bá komunidade sira.

Ho problema sosial barak ne’ebé komunidade Rotuto hasoru, durante ne’e, parte autoridade lokál sira hato’o tiha ona pedidu bá Governu, maibé, to’o oras ne’e seidauk iha resposta ruma.

Suku Rotuto kompostu hosi aldeia lima mak hanesan, Aldeia Hatuhei, Sabou, Fohei, Berteni, Leofat, ho totál uma-kain 5 no abitante  hamutuk 100.

Produtu lokál iha Rotuto mak hanesan, talas-makerek, talas-ángola, fehuk, ai-farina, depois kafé, baunila, xá Timor nian. Maibé, problema ne’ebé toos na’in sira hasoru maka, laiha merkadu.

Esperansa bá Governu Foun

Iha biban ida ne’e, Xefe aldeia Romeu husu Governu foun períodu 2023-2028 tenke tau prioridade bá estrada, tanba ida-ne’e bele fó asesu bá komunidade sira bele lori nia ai-han lokál ruma bele bá Same Vila hodi bele hetan osan oitoan sustenta moris familia moris uma-laran nian.

Jornalista: Rogério Pereira Cárceres