Dom Virgílio Husu Sarani Hotu Reza Atu Eleisaun Sai Duni Festa Demokrasia

Hatutan.com, (23 Abríl 2023), Maubisse – Arsebispu Arkidioseze Metropolitana Díli, Dom Virgílio Kardeál do Carmo da Silva, SDB, husu bá sarani hotu-hotu reza atu ambiente kampaña eleisaun parlamentár  sai duni festa demokrasia bá Timor.

Lee Mós : CNE Rejísta Kríme Eleitorál 10 Iha Viqueque, Baucau no Manufahi

Dom Virgílio Kardeál do Carmo da Silva, SDB. Foto/Dok.Hatutan.com

“Liu-liu bá joven sira, ita buka atu partisipa iha kampaña sira hodi rona ka hatene kona-bá ita-nia direitu no devér sira. Tamba agora nasaun ne’e nia di’ak ne’e depende mós bá ita idak-idak, se maka sei hili ida-ne’e maka sei determina futuru Timor nian no lori dezenvolvimentu bá Timor. Ita reza atu bele ambiente la’o di’ak pás, dame,  ita reza atu ema hotu hakas aan duni atu kolabora halo eleisaun ne’e sai duni festa demokrasia bá Timor,” Sua Eminénsia Virgílio Kardeál do Carmo da Silva, SDB hateten  bá jornalista iha Maubisse,  Segunda (23/04/2023).

Dom Virgílio hateten, nasaun ne’e nia di’ak depende bá iha ema ida-idak hodi determina futuru no dezenvolvimentu Timor nia liuhosi eleisaun parlamentár, 21 fulan-Maiu 2023. Tanba ne’e, sarani nu’udár mós povu Timor atu ezerse ida-idak nia liberdade no evita lia fuan ameasa no hatún malun.

“Hanaran festa demokrasia ne’e katak ema haksolok, kontente, labele iha ta’uk, labele hamoe malu, buat sira-ne’e hotu, la bele ameasa malu mós ne’e katak atu festa ne’e la’o di’ak nia baze maka saida, respeita malu hahú husi kampaña ba to’o iha loron eleisaun, 21 fulan-Maiu 2023,” Dom Virgílio Kardeál do Carmo da Silva hateten.

Atu tane as Timor nia naran iha mundu, tuir Dom Virgílio, pesiza ema hotu nia kolaborasaun di’ak bá malu hodi hametin pás no Estabilidade durante kampaña eleitorál no elisaun ne’ebé se monu iha loron 21 fulan-Maiu, tinan ne’e.

Kontribuidór :                       Moises da Silva Magno