CNRT Sei Rezolve Fronteira Terestre Ho Indonézia

Hatutan.com, (24 Abríl 2023), Díli—Partidu Congresso Nasionál Reconstrução Timorense (CNRT) nia programa ida bainhira hetan fiar atu fila-fali kaer ukun iha Governu, sei rezolve problema fronteira Maritima no Terreste ho Indonézia.

Partidu CNRT hala’o mini kampaña iha kampu futeból Tekinomata, Laga, munisípiu Baucau, Segunda (24/04/2023).

Vise-Prezidente Partidu CNRT, Gil da Costa Monteiro “Oan Soru” fó-sai programa ne’e bá populasaun Laga, munisípiu Baucau iha mini kampaña ne’ebé hala’o iha kampu futeból Tekinomata, Segunda (24/04/2023).

Lee Mós: Iha Hatu-Udo, Partidu Repúblikanu Hosi Uma bá Uma Fahe Materia Kampaña

“Bainhira CNRT fila-fali kaer ukun sei defende soberania liu hosi esforsu hodi rezolve problema fronteira tasi no rai-maran ho Indonézia. Alende ne’e lori Kadoras Greater Sunrise mai Timor-Leste,” Oan Soru  hateten.

Oan Soru hatutan, Iha tinan sira mai ne’e bainhira hakarak dezenvolvimentu la’o ba oin presiza Timoroan hotu nia hamutuk.

Baucau oan hotu tenke brani, metin iha prinsípiu atu hatudu katak povu iha nasaun Timor-Leste presiza dezenvolvimentu.

Koordenadór CNRT Postu Administrativu Baguia, Luis de Oliveira “Oan Fuik” husu ba Prezidente Partidu CNRT Kay Rala Xanana Gusmão bainhira kaer ukun karik, kontinua nafatin hadi’a povu nia moris.

Nia mós kontente tanba CNRT tau nafatin programa atu luta ba soberania Timor-Leste nian, nune’e jerasaun tuir-mai labele hasoru tán problema ho fronteira Marítima no Terestre ho nasaun viziñu Indonézia no Austrália.

“Dezenvolvimentu aban bai rua matenek sira sei halo, maibé fronteira marítima ne’ebé presiza maun bo’ot Kay Rala Xanana Gusmão nia luta tanba ne’e bainhira CNRT hetan fiar husi povu ba ukun, rezolve uluk mak fronteira marítima no Terestre atu jerasaun tuir mai labele ulun moras tán,” Luis de Oliveira Oan Fuik relata.

Oan Fuik mós aprezenta ba Prezidente Partidu CNRT kona-bá kondisaun estrada ligasaun Laga ba Baguia ne’ebé grave tebes no dalabarak liu difikulta komunidade hodi halo movimentasaun no asesu ba merkadu.

Mini kampaña partidu CNRT nian ne’ebé hala’o iha Postu Administrativu Laga ne’e hetan observasaun direita hosi órgaun eleitorál Comissão Nasionál das Eleições (CNE), PDHJ no sosiedade sivil, hetan seguransa másimu hosi Polísia Nasionál Timor-Leste (PNTL).

Jornalista: Vito Salvadór