Ainaro
Iha Hatu-Udo, Partidu Repúblikanu Hosi Uma bá Uma Fahe Materia Kampaña
Hatutan.com (25 Abríl 2023), Ainaro-Partidu Repúblikanu (PR), Domingu (23/4/2023), hala’o kampaña hosi uma bá uma iha Suku Foho Ailaco, Postu Administrativu Hatu-Udo, Munisípiu Ainaro, hodi fahe broxura ka matéria kampaña bá komunidade sira.
Lee Mós : Partidu Repúblikanu Kompromete Loke Servisu Rihun 60 Kada Tinan
Sekretária Jerál Interinu Partidu Repúblikanu, Venâncio Sarmento, haktuir, programa prinsipál hosi partidu ne’ebé lidera hosi João Mariano Saldanha, maka hakbiit ekonomia makro ho mikro hodi fasilita insttor internasionál sira mai investe iha Timor-Leste.
Partidu Repúblikanu (PR), Domingu (23/4/2023), hala’o kampaña hosi uma bá uma iha Suku Foho Ailaco, Postu Administrativu Hatu-Udo, Munisípiu Ainaro. Foto/Joaquim de Fátima Goutinho
Programa esensiál liu ne’ebé Partidu Repúblikanu sei aplika iha Governasaun períodu 2023-2028 bainhira hetan fiar hosi povu mak dada kadoras Greater Sunrise mai rai-maran Timor-Leste.
“Dada kadoras Greater Sunrise mai iha Timor nune’e bele fó servisu bá iha ita-nia joven sira no kontribui direta hasa’e ekonomia iha rai- laran,” Venâncio Sarmento hateten.
Bá rai Hatu-Udo ne’ebé poténsia boot bá ortikultura, Partidu Repúblikanu hanoin ona oinsá atu dezenvolve no halo investimentu iha área pekuária. Nune’e, kondús povu sira haki’ak animal atu prepara bá merkadu lokal no merkadu internasionál.
Partidu Respúblikanu mantein polítika lider nasionál Kay Rala Xanana Gusmão ne’ebé hala’o ona kona-bá negosiasaun fronteira terrestre ho Australia no kontinua halo negosiasaun fronteira ho Indonézia atu termina Timoroan nia soberanu loloos.
“Ita nia maun boot Xanana Gusmão maka loke tiha ona dalan bá iha ne’ebá ita la’o tuir dalan ida ne’e oinsá maka halo negosiasaun para dada kadoras ne’e mai iha ne’e para loke servisu barak ba ita-nia joven sira. Ida-ne’e mak bele absorve kampu servisu bá timoroan hotu iha rai-laran,” Venâncio Sarmento hateten.
Eleitór sira iha Munisípiu Ainaro hamutuk 47.912, kompostu hosi mane na’in-24.775 (52%) no feto 23,137 (48%).
Jornalista : Moises da Silva Magno