PST Ukun Sei Fó Subsídiu Bá Agrikultór Sira

Hatutan.com, (26 Abríl 2023), Díli— Partidu Sosialista Timor (PST) ninia kompromissu Polítika iha kampaña eleitoral 2023 maka, bainhira hetan asentu iha Parlamentu Nasionál (PN) no inklina aan iha formasaun Governu, sei fó subsídiu ba povu agrikultór sira no mós prioritiza povu ne’e nu’udár na’in ba rai.

Partidu Sosialista Timor (PST) hala’o kampaña ho tipu diálogu iha Suku Fatubesi, postu Administrativu Hatulia B, munisípiu Ermera, Tersa (25/04/2023). Foto/PST.

Kompromissu polítika ne’e hato’o hosi Prezidente PST, Avelino Coelho durante kampaña ho tipu diálogu iha Suku Fatubesi, postu Administrativu Hatulia B, munisípiu Ermera, Tersa (25/04/2023).

Lee Mós: Mini Kampaña PD iha Hatu-Builico, Povu Presiza Dezenvolvimentu La’ós Konta De’it Istória

“PST mai hato’o programa eleitorál ba povo. PST hakarak moderniza seitór agrikultura. Hakarak iha Indústria iha Ermera maibé Industria povo nian. Hakarak povu na’in ba nia rai la’ós traballadór iha rai ne’ebé nia bei-ala sira nian. PST hakarak fó subsídiu ba agrikultór sira. Halo estrada di’ak liga Fatubesi ho estrada nasionál ba Dili. Halo uma di’ak ba Familia-sira ne’ebé uma sei aat hela no rezolve problema veteranu sira nian,” Hatutan.com sita deklarasaun Avelino Coelho iha komunikadu.

Promesa ne’e tanba PST haree katak, povu iha área rurál ne’ebé susar atu asesu ba estrada, problema ba bee-moos no seluk tán.

Avelino Coelho fó esperansa katak, Partidu tenki mai ho programa eleitorál ne’ebé fó tulun ba povu nia presiza, tenki mai ho determinasaun atu ajuda povu hodi rezolve nia problema no transforma nia moris, nia agrikultura de subsisténsia ba agrikukltura komersiál no’o industrializada.

“Estadu tenki garante direitu povu, direitu ne’ebé uluk kedan sira nian. Estadu la iha rai, Rai Povu nian. Estadu tenki mai ho programa ne’ebé bele hala’o roda ekonómika komunitária. Estadu tenki lori povu transforma nia agrikultura de susbsistensia ba agrikultura modernizada no’o industrializada hodi halo produsaun familiar sai fonte reseita ekonomika inquebrantável, solida no’o progressive,” nia hateten.

Kampaña PST ho tipu diálogu ne’e hetan observasaun hosi órgaun eleitorál sira hanesan Comissão Nacional das Eleições (CNE) inklui Provedoria dos Direitos Humanos no Justiça (PDHJ).

Jornalista: Rogério Pereira Cárceres