Emisaun pasaporte ne’e ho baze bá Dekretu-Lei 52/2016, kona-bá rejime jurídiku bá pasaporte, seksaun bá da-IV artigu 43, 44 ho artigu 45.
Advertisement
Sidadaun estranjeiru ne’ebé maka halo servisu lori Timor-Leste nia naran ka reprezenta Estadu Timor-Leste ka halo servisu bá Estadu Timor-Leste bele hetan pasaporte traballu no pasaporte diplomátika, maibé ho autorizasaun Xefe Estadu, Governu ka Ministériu Negósiu Estranjeiru no Kooperasaun (MNEK).
Pasaporte Servisu Timor-Leste nian ne’ebé atribui bá antigu Prokuradór Jerál Cabo Verde, Óscar Silva Tavares, nia data emisaun 12 fulan-Abríl 2023 no data válidu to’o loron 11 fulan-Abríl 2028
Asesór jurídiku iha Prokuradór Jerál Repúblika, Óscar Silva Tavares, moris iha Illa de Santiago, loron 16 fulan-Jullu 1973. Lisensiadu iha Direitu, Universidade (clássica) de Lizboa iha Portugal.
Óscar Silva Tavares, sai nu’udár Prokuradór loron 15 Dezembru 1999 no entre tinan 2010 – 2013 hanesan Prokuradór Repúblika Internasionál iha Ministériu Públiku Timor-Leste no hosi 2020 to’o agora asume pozisaun hanesan Asesór Jurídiku iha Prokuradór Jerál Repúblika Timor-Leste.
Daudaun ne’e PGR Alfonso Lopez ho nia asesór jurídiku Óscar Silva Tavares sei iha hela dalan Giné-Bissau mai Portugal no tuir oráriu sira sei to’o hikas fali iha Timor-Leste iha loron 05 fulan-Maiu 2023.
Advertisement
Ministru Justisa, Tiago Amaral Sarmento. Foto/Elio dos Santos da Costa
Ministru Justisa Tiago Amaral Sarmento, ne’ebé Hatutan.com konfirma iha nia fatin servisu, Ministériu Justisa iha Caicoli, Díli, Kinta (27/04/2023), hateten Ministériu Justisa la simu pedidu hosi Prokuradór Jerál Repúblika (PGR, portugés) hodi emite pasaporte Timor nian ho tipu Pasaporte Servisu Timor-Leste (PSTL) bá sidadaun estranjeiru ida ne’ebé servisu iha PGR.
“Pasaporte Servisu Timor-Leste nia stock sei iha tamba ne’e Ministériu hotu-hotu husu la’ós PGR de’it, tamba ne’e pasaporte ofisiál bá Timoroan iha maibé bá ema estranjeiru ne’e lae,” Ministru Justisa Tiago Amaral Sarmento esplika.
Governante ne’e hatutan, Pasaporte Servisu Timor-Leste nian bele fó bá ema estranjeiru bainhira hetan ona nasionalidade Timorense liuhosi kazamentu ka naturalizasaun tamba ne’e normálmente lei nasionalidade permite mais kona-bá emisaun pasaporte Servisu nian ba ema estranjeiru ne’e laiha no ha’u lahatene.
“Ha’u la hetan informasaun no la hatene, ne’ebé deskulpa karik iha bá mak ha’u ko’alia, la iha ne’e ha’u atu ko’alia oinsá,” Ministru Tiago Amaral Sarmento haktuir.