PLP Sei Loke Kréditu Bá Estudante Sira

Hatutan.com ( 28 Abríl 2023), MANUFAHI—Partidu Libertasaun Populár (PLP) hakarak loke programa ida hodi fó kréditu bá estudante sira iha banku no bainhira hetan servisu ruma mak selu ka rekopera fali.

Partidu Libertasaun Popular (PLP) hala’o kampaña iha kampu futeból munisípiu Manufahi, Sesta (28/04/2023). Foto/Elio dos Santos da Costa.

Programa ne’e haklaken hosi Prezidente Partidu Libertasaun Popular (PLP), Taur Matan Ruak iha intervensaun polítika durante kampaña iha kampu futeból munisípiu Manufahi, Sesta (28/04/2023).

Lee Mós: Kampaña Iha Seloi-Kraik, PDC Promete Hasa’e Folin Kafé

Objetivu atu fó kréditu bá estudante sira ne’ebé sei hala’o hela prosesu estudu ne’e, atu labele fó todan ba inan aman sira, tanba joven barak la kontinua sira nia estudu tanba inan aman kbi’it la to’o atu sustenta oan sira bá eskola, nune’e programa ida ne’e bele hafásil sira atu asesu bá edukasaun. 

Taur Matan Ruak hateten, kréditu ne’e la’ós fó bá estudante sira de’it, maibé iha programa ida hakarak atrai universidade sira bele loke tán ramu bá iha Munisípiu tolu mak hanesan Manufahi, Baucau no Bobonaro.

‘‘Universidade sira iha Díli ne’ebé mak hakarak ba loke iha munisípiu tolu ne’e, governu fasilita kréditu hodi nia selu de’it nia osan inan, no la selu funan. Governu mak hola resposabilidade tomak, maibé ita tenke halo sala de aula, uma ba professór sira ho nia familia sira hela no mós uma ba alunu sira hodi hela,” Taur Matan Ruak hateten.

Líder másimu PLP ne’e haforsa katak, Munisípiu Manufahi sei sai hanesan fundu dezenvovlimentu Timor nian, tanba agora dau-daun iha fundu dezenvolvimentu ida iha Oecusse, halo hela estudu rua hotu ona, agora atu husu ida tán iha Manufahi, Baucau no Maliana.

Númeru Eleitór ne’ebé Sekretariadu Tékniku Administrasaun Eleitorál (STAE) fó sai katak  iha Munisípiu Manufahi totál votante 42.126, Mane 22.234 ho 53% no feto 19.902 ho 47%, mak sei tuir eleisaun Parlamentár iha 21 Maiu 2023.

Tuir observasaun Hatutan.com iha terrenu nota katak, kampaña PLP ho tipu komisiu iha Kampu futeból Same Vila ne’e hetan observasaun másimu hosi Comissão Nasionál Eleições (CNE) no hetan mós seguransa hosi Polísia Nasionál Timor Leste (PNTL).

Jornalista: Elio dos Santos da Costa