Nasionál
Xefe Estadu Komprometidu Ko’alia ho Governu Foun Apoia Mídia iha Timor-Leste
Hatutan.com, (03 Maiu 2023), Díli- Xefe Estadu, José Ramos-Horta komprometidu ko’alia ho IX Governu Konstitusionál atu apoia órgaun komunikasaun sosiál sira ka mídia sira, liuliu média privadu atu bele servisu ho di’ak.
Lee Mós : Ramos-Horta: “Ha’u Lee Bebeik Hatutan.com, Notísia Kualidade no Diferente,”
Prezidente Repúblika, José Ramos-Horta. Foto/Elio dos Santos da Costa
Prezidente Repúblika, José Ramos-Horta sei husu atu Governu foun perídou 2023-2028 tau filafali iha orsamentu Estadu nian atu apoiu mídia sira ne’ebé uluk Prezidente Repúblika, Francisco Guterres “Lú Olo” veta.
“Há’u hateten la’ós fó apoiu para atu buka kontrola servisu mídia no jornalista sira nian, lae. Fó apoiu atu fasilita sira servisu diak liután, servi públiku ho informasaun ne’ebé kredivel, imparsiál, bazeia ba faktus no kualidade,” Xefe Estadu, José Ramos-Horta haktuir bá jornalista sira bainhira komemora loron mundiál liberdade imprensa hamutuk ho jornalista sira iha Palásiu Prezidensiál, Díli, Kuarta (03/05/2023).
Ramos-Horta hatutan, aleinde apoiu finanseiriu, ekipamentu no infraestrutura, apoiu mós formasaun iha língua no parte seluk ne’ebé importante atu tulun servisu mídia ok jornalista sira nian.
Jornalista sira tenke iha intesifikasaun para média, televisão no sosiál média tenke iha kualidade hanesan nasaun sira seluk, no atu kapasita jornalista sira sai mos hanesan Xefe Estadu nia preokupasaun tamba ne’e hahú iha fulan-Juñu bá oin, Xefe Estadu sei ko’alia klean ho Governu foun hamutuk ho parseiru internasionál sira atu bele apoiu órgaun komunikasaun sosiál sira hotu iha Timor-Leste.
“Espera katak rezultadu eleisaun ne’ebé sei mai, produz rezultadu ida ne’ebé garante estabilidade governativa bá rai ida-ne’e. Fó rezultadu ida di’ak ne’ebé atu bele halo buat barak, planu bá tinan lima oin mai,” Horta hateten.
“Ita nia prióridade ida mak sei fo apoiu ba mídia, ba mídia sira ne’ebé hatudu tiha ona rezultadu ruma, no ajuda mós tenke iha kriteria ruma, la’ós hateten deit atu fó apoiu, maibé apoiu bá sira ne’ebé iha tinan sira nia laran hatudu tiha ona kompromisu no dedikasaun. Apoiu ne’e sei halo konsultasaun ho Conselho de Imprensa de Timor Leste no Asosiasaun Jornalista sira atu haree saida mak di’ak liu,” Ramos-Horta afirma.
Xefe Estadu sujere bá mídia sira halo kobertura kona-bá violénsia doméstika, ko’alia kona-bá nutrisaun, kiak sira para bolu ukun nain sira nia atensaun oinsa tau matan. Mídia mós bele hakerek kona-bá autoridade sira nia atuasaun no asaun sira iha komunidade nia leet no ida importante mós mak média tenke eduka povu bá meiu ambiente atu joven sira labele soe foer arbiru.
Kontinua Hatudu profisionalizmu no Imparsiál
Ekipa redasaun no multimédia Hatutan.com hasai foto hamutuk ho Prezidente Repúblika, José Ramos-Horta iha serimónia aniversáriu Hatutan.com ba dahuluk no iha ámbitu asina akordu asina Memorandum of Understanding (MoU) ho Telkomcel kona-bá uza Sim Card Telkomcel ho pulsa zero bele asesu notísia iha portál Hatutan.com, iha Suai Room, Timor Plaza, Kuarta (12/10/2022). Foto/dok.
Iha komemorasaun loron mundiál liberdade imprensa ne’e, Prezidente Repúblika hato’o parabéniza bá jornalista sira hotu no husu kontinua kna’ar ne’ebé importante tebetebes ho profisionál no imparsiál
Horta hateten, kondisaun ohin bá média di’ak liu uluk, tanba uluk atu halo de’it jornál oan ida pájina 12 atu halo imprime ne’e kualidade difisil tebe-tebes, mákina ne’e ladún di’ak.
“Ba jornalista hotu-hotu hakru’uk bá imi no parabéns bá loron ida-ne’e, bá jornalista ne’ebé mate fó sira-nia vida bá rai ida-ne’e hakru’uk bá sira-nia memória,” Prezidente Repúblika José Ramos-Horta hateten.
Jornalista Timoroan no internasionál, Balibó Five bá sira no sira seluk tan iha mundu ne’ebé kontribui maka’as no erói boot Max Sthall.
“Ba Max Sthall, ita nia erói ida, bá jornalista hotu-hotu, jornalista iha mundu parabéns bá loron ida ne’e, la’ós parabéns de’it, maibé hakru’uk ho respeitu bá jornalista sira,” Ramos-Horta dehan.
Diretora Média One Timor, Suzana Cardozo hato’o mós parabáns bá jornalista sira ne’ebé ohin selebra loron mundiál liberdade imprensa, espera katak bá oin sei sai di’ak liután no kualidade liután.
“Ikus ne’e ami jornalista barak mak marka prezensa Tribunál tanba de’it asuntu sira ne’ebé publikasaun informasaun sira ne’ebé tuir loloos hosi parte Conselho de Imprensa nia kompeténsia atu halo mediasaun kona-bá disputa produtu Jornalístiku tuir mandamentu Lei Komunikasaun Sosiál. Espera katak ida-ne’e sai hanesan kestaun ida bá ita hotu-hotu tantu mídia na’in, jornalista sira, Governu no husu tulun ba Prezidente Repúblika,” Suzana Cardoso hateten.
Jornalista : Vito Salvadór