UNDERTIM Promete Hasa’e Saláriu Professores

Hatutan.com, (04 Maiu 2023), Díli—Partidu Unidade Nacional Democratica da Resistência Timorense (UNDERTIM), promete  bainhira hetan fiar iha eleisaun Parlamentár  tinan ne’e atu forma Governu da-sia, sei hasa’e saláriu bá manorin na’in sira.

Prezidente UNDERTIM, Francisco Guterres “Manu-bui”.

Prezidente UNDERTIM, Francisco Guterres “Manu-bui”  fós-sai planu estratéjiku bá dezenvolvimentu nasionál maka, tenke hadi’a infra-estrutura iha eskola sira, modifika kurríkulu eskolár no tau-matan bá professór sira-nia bem-estár.

Lee Mós: Bainhira Hetan Fiar Iha Eleisaun, UNDERTIM Hakarak Dezenvolve Seitór Importante Lima

“Sira-nia saláriu ne’e tenke hasa’e bá 50%, hosi sira-nia vensimentu. Uluk, Indonézia nia tempu, iha gratifikasaun atu nune’e sira ho laran, hodi hanorin labarik sira,” Francisco Guterres “Manu-bui” hateten bá Hatutan.com, iha sede nasionál Becusse, Suku Becora, Postu Administrativu Cristo Rei, Dili.

Tuir UNDERTIM nia haree katak, professór sira balun hetal dook hosi eskola mak ba hanorin ho transporte rasik.

Ida ne’e, presiza tebes insentivu ida di’ak no tenke hasa’e duni sira nia saláriu atu bele hadi’a sira nia moris ka responde sira nia nesesidade lorloron nian.

Tuir UNDERTIM, atu hadi’a lakuna sira durante ne’e iha seitór edukasaun, tenke haforsa mós iha edukasaun morál, tanba ida-ne’e nu’udár baze ida bá kultura Timorense, nune’e labarik sira apreende respeita malu.

“Estudante sira atu sai ema kualifikadu, professór sira-nia vensimentu tenke hanesan ho funsionáriu sira baibain. Ami hakarak hasa’e saláriu professór sira nian bá 50% hosi saláriu atuál,” nia hateten.

Bainhira kaer ukun, UNDERTIM mós sei buka mellora universidade sira iha rai-laran. Estudante sekundáriu sira atu bá to’o bá universidade, hirak ne’ebé hetan valór di’ak, tenke haruka bá eskola iha liur atu bele sai matenek, fila-fali mai bele dezenvolve TL.

Jornalista: Rogério Pereira Cárceres