KHUNTO Hakarak Hadi’a Estrada Maubisse-Turiscai

Hatutan.com,  (07 Maiu 2023), Manufahi-Bainhira povu fó fiar bá Partidu KHUNTO hodi lidera IX Governu períodu 2023-2028, Armanda Berta dos Santos, kompromete hadi’a estrada diresaun  Postu Administrativu Maubisse, Munisípiu Ainaro bá Postu Administrativu Turiscai, Munisípiu Manufahi.

Lee Mós : Programa Foun KHUNTO, Kria Empregu bá Timoroan Analfabetu ho Saláriu Mínimu

Prezidente Partidu KHUNTO, Armanda Berta dos Santos iha mini kampaña Partidu KHUNTO nian iha Turiscai, Domingu (07/05/2023), informa bá Turiscai oan sira katak estrada Turiscai tama ona iha planu VIII Governu nian no fiar katak bainhira KHUNTO kontinua envolve iha IX Governu kontinua luta bá aselera hadi’a Estrada refere.

Mini kampaña Partidu KHUNTO nian iha Postu Administrativu Turiscai, Munisípiu Manufahi, Domingu (07/05/2023). Foto/Joaquim Coutinho

“Estrada ne’e ita hotu mak asesu tanba ne’e tenke tau prioridade, inklui hadi’a sistema edukasaun no  fasilidade saúde,” Armanda Berta dos Santos hateten.

KHUNTO mós kompromete dezenvolve sítiu turístiku sira ne’ebé eziste iha Postu Administrativu Tuirscai, nune’e bele fó rendimentu bá povu. e.

Partidu KHUNTO mós sei dezenvolve setór produtivu seluk hanesan agrikultura hodi hasa’e produsaun rai-laran atu nune’e kontribui bá kreximentu ekonómiku família ni’an.

Iha fatin hanesan Konselleiru Másimu Partidu KHUNTO, José do Santos Naimori Bucar promete defende nafatin unidade nasionál no hakuak juventude hotu tuir lema Partidu KHUNTO nian “Tane O Lisan, Tane O Emar, no Tane O Rain”.

“KHUNTO nia luta maka hakarak ema hot-hotu  sai maun-alin, ema hot-hotu hakarak sai família. Sekarik balun la gosta KHUNTO husik ba lalika vota, se karik balu maka gosta KHUNTO vota bá KHUNTO,” Naimori hateten.

Ho ida ne’e fó hanoin fali katak, programa prioridade seluk sei implementa  hosi Partidu KHUNTO bainhira hetan fiar maka sei hadi’a setór saúde, edukasaun, agrikultura, formasaun bá foin-sa’e sira, no  hadi’a problema infra-estrutura báziku, inklui dezenvolve setór produtivu sira seluk.

Mini kampaña eleitorál bá loron-19 Partidu KHUNTO iha Turiscai, Munisípiu Manufahi, hetan seguransa husi PNTL no supervizaun hosi  brigada CNE ho observadór sira seluk tán.

Jornalista : Moises Magno