Prezidente Repúblika Husu Adjuntu PJR Na’in-Tolu Assegura Interese Estadu

Hatutan.com, (10 Maiu 2023), Díli— Prezidente Repúblika (PR), José Ramos-Horta husu bá Adjuntu Prokuradór Jerál Repúblika (PJR) na’in tolu ne’ebé foin simu posse atu hala’o funsaun ho di’ak no assegura interese Estadu.

Prezidente Repúblika, José Ramos-Horta fó posse bá Adjuntu Prokuradór Jerál Repúblika foun na’in-tolu hanesan Nelson de Carvalho, Jacinto Babo Soares no Angelina Joaninha Saldanha, iha Palásiu Prezidensiál Bairru-Pité, Tersa (09/05/2023).Foto/Elio dos Santos da Costa.

Adjuntu PJR foun ne’ebé foin simu posse mak hanesan Nelson de Carvalho, Jacinto Babo Soares no Angelina Joaninha Saldanha.

Lee Mós: Prezidente Repúblika fó Posse ba Remígia de Fátima da Silva Nu’udar Adjunta PJR

“Ha’u iha esperansa katak, sira na’in tolu sei dezempeña funsaun ho forma ezemplár no assegura interese Estadu,” Ramos-Horta hateten iha serimónia posse ne’ebé hala’o iha Palásiu Prezidensiál Bairru-Pité, Tersa (09/05/2023).

Serimónia ne’e realiza bazeia bá ezersísiu kompeténsia hosi Konstituisaun Repúblika Demokrátika Timor Leste (RDTL) bá Xefe Estadu hodi fó posse bá Majistériu Públiku na’in-tolu nu’udár Prokuradór Repúblika Primeira Klase bá Adjuntu Prokuradór Jerál Repúblika.

Iha Fatin hanesan, empossada Angelina Saldanha agradese ba konfiansa hosi Xefe Estadu atu ezerse funsaun nu’udár Adjunta Prokuradora Jerál ne’ebé sei konjuga ho Prokuradór Jerál hodi hala’o knaar no servi Ministériu Públiku (MP) atu trata justisa ne’ebé mak di’ak iha nasaun ne’e.

“Konfiansa ne’ebé mak Prezidente Repúblika fó mai ami, sei toma ida-ne’e atu ezerse funsaun hotu-hotu tuir Lei, fasilidades, neutralidade no objetividade,” nia promete.

Tuir Estatutu Ministeriu Publiku artigu 193, Lei númeru 7,2022, 19 fulan Maiu, Adjuntu Prokuradór na’in-tolu  ne’e hanesan Komisaun bá Servisu durante tinan haat, bainhira iha nafatin konfiansa sei nomeia fila fali dala ida tan ba tinan haat.

Jornalista Estajiáriu: Lazaro Pereira Quefi