Hatutan.com, (16 Maiu 2023), Díli—Partidu União Demoratica Timoresne (UDT) promete katak, bainhira hetan fiar hodi kaer ukun iha Governu tuir mai, sei aprova Orsamentu Jerál Estadu (OJE) bazeia bá Programa, halo kontrolu másimu no ezekuta ho transparente tanba osan ne’e povu nian.
UDT sei la gasta osan Estadu arbiru tanba bainhira orsamentu ne’ebé mak ho montante bo’ot la korresponde ba programa ne’ebé mak ki’ik, automatikamente iha ona indisius atu hamosu korrupsaun.
Lee Mós: Lakohi Depende Bá Fundu Petrolíferu, UDT Sei Dezenvolve Seitór Haat
UDT nia program aida ne’e mosu tanba, Partidu ne’e haree katak, osan ne’ebé mak gasta hosi Estadu durante tempu naruk, osan ne’ebé sai ka despeza laiha transparansia bá públiku atu bele hatene katak, osan hira mak fila bá kofre Estadu.
“Ho ida-ne’e maka bainhira UDT ba kaer ukun, hakarak tau prioridade atu halo kontolu másimu atu poupa Orsamentu povu nian iha rai ida-ne’e,” Prezidente UDT Francisco David Carlos hateten iha salaun Mahoka, Díli, Tersa (16/05/2023).
UDT mós haree katak, Governu halo investimentu bá iha expo Dubai no sei halo tán ba expo Japaun, ne’e gasta de’it osan Estadu nian, retornu laiha, enkuantu povu ne’e sei halerik ba buat barak hanesan bee-moos, eletrisidade, estrada, edukasaun no saúde.
UDT sei halo kontralu másimu liu ba Orsamentu povu nian tanba oras-ne’e daudaun aprovasaun Orsamentu kada tinan ne’e depende de’it ba fundus petrolíferu no seidauk diversifika ekonomia hosi área produtivu sira, signifika iha futuru laiha sustentabilidade ekonomia iha Timor Leste.
Jornalista Estajiáriu: Lazaro Pereira Quefi
