Asegura Eleisaun Parlamentár, Membru PNTL Hetan Subsídiu $10 Kada Loron

Hatutan.com, (17 Maiu 2023), Díli—Ministériu Initeriór (MI) deside ona hodi hasa’e ka aumenta subsídiu bá membru Polísia Nasionál Timor-Leste (PNTL) durante asegura kampaña eleitorál no Eleisaun Parlamentár 2023, kada loron $10.

Membru Polísia Nasionál Timor Leste (PNTL) hosi Bataliaun Orden Publika (BOP) organiza formatura jerál hodi hala’o patrullamentu konjunta iha Dili, Sesta (09/09/2022). Foto/Elio dos Santos da Costa.

Vise-Ministru Interiór (VMI), António Armindo hateten, membru PNTL sira-nia alimentasaun, kuaze lorloron sira hetan, maibé bainhira iha kualkér operasaun, membru seguransa sira parese sei aumenta subsídiu alimentasaun. 

Lee Mós: PNTL Díli Sei Hatun Membru Tomak Atu Asegura Kampaña Ikus

“Subsídiu tán bá sira durante kampaña ho eleisaun ne’e, sira-nia rejíme remuneratóriu uluk aprova ona. Sira lorloron hetan $10. Depois komandu iha meius hotu-hotu atu bele ajuda sira-nia membru,” António Armindo hateten hafoin sorumutu Konsellu Ministru iha Palásiu Governu, Dili, Kuarta (17/05/2023).

António Armindo afirma, kondisaun bá membru PNTL sira nian, governu la preokupa tanba buat hotu la’o di’ak hela.

Kona-bá sira-nia ekipamentus ho buat seluk tán, tinan kotuk, sosa ekipamentu bá membru polísia sira hotu hanesan gás-gan ho sira seluk.

“Sira preparadu atu asegura eleisaun. Kuandu ministériu seidauk hetan pedidu, signifika sira di’ak hela,” António Armindo hateten.

Tanba ne’e, António Armindo haree katak, seguransa bá iha eleisaun agora daudaun ne’e, la’o di’ak, hotu-hotu preparadu, bazeia bá komandu PNTL ninia planu operasaun ne’ebé mak Komandante Jerál ho Komandante operasaun halo ona.

Jornalista: Rogério Pereira Cárceres