Bernard mós sai advogadu bá “Sasin K ka Witness K” ne’ebé denúnsia kámara espionájen ne’ebé Austrália orienta no monta iha Palásiu Governu nian hodi apaña diskusaun hotu-hotu ne’ebé Timor-Leste nian autoridade sira halo kona-bá asuntu estratéjiku sira sobre Tasi Timor.
Hosi deskobrimentu bá kámara espionájen ne’e mak Timor-Leste iha liu tán kbiit hodi anula tratadu sira anteriór no avansa bá diskusaun delimitasaun Permanente Fronteira Marítima.
Advertisement
Povu Timor Nia Aswain Boot
Bernard Collaery hoo “Sasin K ka Witness K” foti papél boot iha momentu ne’ebé sira nian Governu ignora diretu fundamentál Povu Maubere nian.
“Bernard Colleary ho nia ekipa advogadu, ninia kontribuisaun bá Timor-Leste ne’e, ita sura labele. Ita mai simu de’it iha ne’e, ne’e importante, mais ne’e de’it la to’o, ne’e tenke sai tiha ita-nia membrus família Timor-Leste nian,” Portavós MKOT, Celestino Gusmão hateten bá jornalista sira, hafoin simu Advogadu Bernard Collaery iha Aeroportu Internasionál Nicolau Lobato, Comoro-Díli, Kinta (18/05/2023).
Celestino Gusmão hateten, antes ne’e, MKOTT husu tiha ona bá Estadu Timor-Leste atu fó kondekorasaun, medalla orden Timor-Leste bá Bernard no pedidu ida ne’e, Governu aprova, no konsege atribui duni kondekorasaun bá ninia kontribuisaun sira tomak.
“Ami husu, sei iha dalan ruma karik, Timor-Leste bele, MKOTT seidauk diskute klean ida ne’e, mais ha’u nia opiniaun pesoal, ami hanoin katak, nia hanesan Timor Oan karik, ita bele simu nia sai tiha sidadaun no membru família boot Timor-Leste nian permanente,” nian haktuir.
Advertisement
Celestino Gusmão informa, iha surumutu ho Bernard Collaery ne’e, sei koalia de’it kona-bá ninia esperiénsia hotu ne’ebé nia enfrenta, nomós parte MKOTT sei konversa ho nia nu’udár maluk, kolega.
“Entaun, ami sei saudades nia kleur tebtebes, iha momentu hotu difísil, mais agora, iha oportunidade di’ak, ami atu hasoru malu direta,” nia tenik.
Movimentu Kontra Okupasaun Tasi Timor (MKOTT) simu prezensa Advogadu Bernard Colaery iha Aeroportu Internasionál Prezidente Nicolau Lobato, Díli, Kinta (18/5/2023). Foto/Rogério Pereira Cárceres
MKOTT husu bá membru sira MKOTT nian, Universitáriu sira, Ativísta sira, ho populasaun sira hotu, partidu politiku sira hotu, bele bá halibur malu, atu selebra hamutuk iha momentu ida ne’ebé di’ak tebtebes.
“Ita selebra hamutuk vitória fronteiras marítimas, no ita bele halo kontente hamutuk iha Asosiasaun HAK Faról. Simu Ita-nia Belun Boot advogadu Australianu Bernard Collaery ne’ebé nu’udar Heroi Povu Timor Leste nian kona-bá prosesu delimitasaun Fronteira Marítima,” Celestino hateten.
Timor-Leste nia belun boot, Advogadu Bernard Collaery to’o iha Aeroportu Internasionál Nicolau Lobato, Comoro-Díli, iha tuku 14:00 Otl, ho aviaun Zet, marka VH-OFX hosi Austrália mai Timor-Leste akompaña mós hosi nia membru família na’in-lima.
Tuir ajenda, Bernard Collaery sei simu Medalla Orden Timor-Leste hosi Xefe Estadu Ramos-Horta, iha Sesta, 19 fulan-Maiu 2023, bá sakrifisiu no dedikasaun ne’ebé nia presta hodi solidariza Povu Timor no rai ki’ik ida-ne’e.
Advertisement
Bernard Jose Edward Collaery, moris iha loron 12 Outubru 1944. Nia mak advogadu no eis-polítiku Austrália nian. Collaery nu’udar membru bá Asembleia Lejizlativa dahuluk iha kapitál Austrália nian ba Rezidente sira, husi tinan 1989 to’o 1992. Nia serve nu’udár Vise-Xefe no prokuradora-jeral Repúblika nian husi tinan 1989 to’o tinan 1991 iha Governu kaine Aliansa nian.