Hatutan.com, (20 Maiu 2023), Díli—Prezidente Repúblika (PR), José Ramos-Horta husu atu sidadaun hotu-hotu partisipa iha eleisaun Parlamentár hodi ba vota tuir ida-idak nia direitu no obrigasaun.
“Povu maka há’u hadomi, aban ita hotu sei bá vota. Ha’u husu ba maluk sira hotu ho kartaun eleitorál atu bá vota tuir ida-idak nia direitu no obrigasaun,” Ramos-Horta hateten iha diskursu komemorasaun loron restaurasaun independénsia ba dala XXI, iha Palásiu Prezidensiál Nicolau Lobato Bairru-Pité, Sábadu (20/05/2023).
Lee Mós: Asegura Eleisaun Parlamentár, Membru PNTL Hetan Subsídiu $10 Kada Loron
Xefe Estadu hato’o parabens ba órgaun eleitorál, STAE no CNE iha ida-idak nia fatin, tanba hala’o knaar lalais no profisionál iha prosesu eleitorál nia laran.
Parabens mós ba Polísia Nasionál Timor Leste tanba hala’o knaar ho imparsialidade iha prosesu eleitorál nia laran.
Bá Forsas Armadas sira mós merese hetan parabens ba servisu ne’ebé sira hala’o hodi fó tulun ba Polísia Nasionál Timor Leste hodi marka prezensa iha fatin loos.
Parabens mós ba autoridade munisipál, Xefe Suku no Xefe Aldeia sira-ne’ebé badinas iha oin hodi kaer knaar ba lala’ok lorloron iha rejiaun foho nomós iha bairru sidade kapitál nian, parabens no agradese ba Komisaun Justisa no Dame ba kontribuisaun ne’ebé fó iha prosesu edukasaun sívika no observasaun nomós fiskalizasaun iha prosesu eleitorál.
Agradese sistema Nasoens Unidas nian no liuliu PNUD ba tulun tékniku ne’ebé fó prontu kedan hodi hadalan prosesu demokrátiku eleitorál.
Ba nasaun belun hirak-ne’ebé simu timoroan iha sira-nia rain no loke dalan ba maluk sira bele bá-mai hodi hala’o direitu eleitorál.
Bem-vindo ba observadór internasionál sira, liuliu observadór sira hosi Union Government of Myanmar. Hein katak lakleur demokrasia sei fila ba povu Myanmar.
“Ba partidu polítiku hotu-hotu ne’ebé rejistadu ba eleisaun ida-ne’e, ha’u haruka ha’u menon di’ak hodi dehan rahun di’ak no susesu. Balun sei halo festa no balun sei laran triste karik. Demokrasia hanesan ne’e duni. Vida la’o ba oin nafatin, nasaun ne’e mós sei la’o nafatin, dezafiu mesak boot, oportunidade mós boot. Nasaun presiza ita hotu. Sei la iha ne’ebé halakon. Sei iha de’it ksolok ba ita-nia demokrasia ne’ebé maske joven hela maibé dinámika no buras abut ona iha ita-nia kultura no identidade,” Ramos-Horta subliña.
Xefe Estadu parabeniza Prezidente Parlamentu Nasionál Aniceto Guterres no Deputadu sira hotu, ba produtividade lejislativa no ba knaar iha Lejislatura Da-limak besik atu remata.
Ba Primeiru Ministru Taur Matan Ruak, Xefe Estadu fó parabens tanba hatene hakat liu situasaun susar – krize polítika, dezastre naturál, pandemia no kaer kuda-talin metin maske impaktu maka’as hosi funu Ukránia ho konsekuénsia ba mundu no ba povu.
Jornalista : Vito Salvadór
