Eleisaun Parlamentár Sussesu, PN Kongratula Maturidade Polítika Povu TL

Hatutan.com, (26 Maiu 2023), Díli—Prezidente Parlamentu Nasionál (PPN), Aniceto Guterres kongratula povu Timor-Leste ne’ebé hatudu ona maturidade politika hodi kontribui kria pás no estabilidade durante períodu eleisaun Parlamentár ne’ebé la’o ho susesu tebes.

Prezidente Parlamentu Nasionál, Aniceto Guterres hala’o enkontru ho Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité, Sesta (26/05/2023). Foto/Média PR.

“Nu’udár Prezidente PN ha’u hakarak felisita povu Timor Leste tomak ne’ebé hatudu ninia maturidade iha prosesu demokrasia iha ita nia rain, halo ita nia demokrasia sai tasak liu tán,” Aniceto Guterres hateten hafoin enkontru ho Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité, Sesta (26/05/2023).

Lee Mós: MOE CPLP Observa Eleisaun Parlamentár Iha TL Livre no Transparente

Aniceto Guterres observa katak, eleisaun Parlamentár ida ne’e, ema hotu-hotu mós asiste katak la’o di’ak tebes, kalma, kompara ho eleisaun anteriór eleisaun ida-ne’e di’ak liu.

Kona-bá partidu balun atu lakon ka manán ne’e kestaun seluk, maibé nia prosesu ne’e hanesan prosesu demokrátiku ida la’o di’ak ne’e tanba lideransa Estadu ida-ne’e nian.

Prezidente Repúblika nu’udár Xefe Estadu, kondúz prosesu ne’e tomak enome Estadu la’o ho di’ak. Tanba ne’e hanesan reprezentante povu, no nu’udar Prezidente Parlamentu Nasionál mai felisita Xefe Estadu ba susesu ida ne’e.

“Orgullu Timor tomak nian nu’udar rai ida ne’ebé Estadu foun, país foun, demokrasia mós sei nurak hela maibé ho susesu sira iha nível ida-ne’e bele dehan demokrasia agora di’ak no povu kadaves maduru liu,” nia hateten.

Iha enkontru ho Xefe Estadu ko’alia mós assuntu seluk kona-bá kontinuidade funsionamentu órgaun Estadu ninian. Eleisaun hotu tuir kalendáriu, bainhira Tribunál valida ona rezultadu eleisaun, klaru prosesu tuir mai prosesu formasaun IX governu.

Agora Parlamentu Nasionál mós atu besik ona Kinta lejislatura nia rohan, ne’e órgaun Estadu sira tenke tur hamutuk ko’alia ba kontinuidade funsionamentu órgaun Estadu sira ninian ne’e labele para, oinsá mak atu ajusta prosesu ida ne’e to’o buat hotu funsiona normál fila-fali. Tranzisaun transferensia hosi governu ida ba governu seluk, hosi lejislatura ba lejislatura seluk.

Iha fatin hanesan, Prezidente Repúblika José Ramos-Horta hateten, Parlamentu Kinta lejislatura ida ne’e servisu todan ba Prezidente Parlamentu, Dekretu Lei lubuk ida tinan 20 indepedénsia, lejislatura ida ne’e mak hanesan produtividade lejislativa barak tebe-tebes no importante.

“Prezidente PN hateten bankada FRETILIN sei buka kolabora atu garante estabilidade governasaun di’ak, relasionamentu di’ak iha Parlamentu Nasionál laran ajenda ba ASEAN nian todan tebe-tebes,” José Ramos-Horta, hateten.

Jornalista: Vito Salvadór