Konstrusaun Edifísiu Tribunál Dili Atrazu

Hatutan.com, (26 Maiu 2023), Díli-Projetu konstrusaun edifísiu foun Tribunál Judisiál Primeira Instánsia Díli (TJPID) nian, oras ne’e, foin atinje porsentu 62, tanba ne’e, Prezidente Tribunál Rekursu (PTR), Deolindo dos Santos, fiar katak, Governu foun bele kontínua hodi finaliza obra ne’e.

Obra ne’e ezekuta hosi  Kompañia internasionál  China Shandong International Economic & Technical Cooperation Group, R.P, no hetan supervizaun hosi Kompañia DACREA (Archtimor Engineering Conultents) parseria ho AEC ho kustu finansiamentu millaun $10,990.

Prezidente Tribunal Rekursu, Deolindo dos Santos. Foto/Dok.Espesál

Projetu harii edifísiu TJPID ne’e lansa direta hosi Primeiru-Ministru (PM), Taur Matan Ruak,  iha loron 25 fulan-Novembru 2020 no tuir loloos, projetu ida-ne’e, tenke konklui ona iha loron 6 fulan-Marsu  2022. Maibé tanba pandemia globál COVID-19 prejudika projetu ne’e la’o tarde no nia progresu fíziku  foin atinje 62%.

“Ha’u hato’o bá sua-exelénsia primeiru ministru katak, mezmu  ita-nia governasaun hotu ona, mais, ha’u fiar metin katak, governu ne’ebé tuir mai ne’e, servisu hamutuk ho ha’u nafatin para atu bele kontínua obra ida ne’e,” PTR Deolindo dos Santos hateten bá jornalista sira, hafoin soru-mutu ho Primeiru Ministru, Taur Matan Ruak, iha Palásiu Governu, Sesta (26/05/2023).

PTR Deolindo hateten, projetu ida-ne’e ho nia kustu orsamentu  boot tebes, tanba ne’e, presiza halo ho di’ak, atu nune’e, obra ida ne’e termina ho kondisaun ne’ebé di’ak mós.

Uainhira projetu konstrusaun ne’e konklui, sei sai hanesan edifísiu ida importante bá Timor-Leste, tanba ko’alia kona-bá Tribunál Distritál Dili, nia númeru prosesu ne’e boot tebetebes.

Jornalista: Rogério Pereira Cárceres