Ramos-Horta Kondekora Embaixadór Reinu Tailândia Ho Medalla Ordem de Timor-Leste

Hatutan.com, (07 Juñu 2023), Díli—Prezidente Repúblika (PR), José Ramos-Horta kondekora Embaixadór Reinu Tailândia, Ekapol Poolpipat ho Grau Medalla  Ordem de Timor-Leste ba kontribuisaun signifikativamente ne’ebé lori benefísiu ba povu Timor-Leste no ba umanidade.

Prezidente Repúblika (PR), José Ramos-Horta kondekora Embaixadór Reinu Tailândia, Ekapol Poolpipat ho Grau Medalla Ordem de Timor-Leste ba kontribuisaun signifikativamente ne’ebé lori benefísiu ba povu Timor-Leste no ba umanidade. Foto/Média PR.

Grau Ordem de Timor-Leste kria hosi Dekretu-Lei nú. 20/2009, 06 de maio. Kondekorasaun ba Embaixadór Reinu Tailândia Ekapol Poolpipat nu’udár rekoñesimentu ba servisu ne’ebé diplomata ne’e hala’o iha âmbitu promove amizade entre povu nasaun rua ne’ebé kontribui mós ba kria pás, estabilidade nasionál no Dezenvolvimentu iha Timor-Leste.

Lee Mós: Prezidente Repúblika Kondekora Embaixadór Korea Súl ho Medalla Méritu

Ho nune’e, Prezidente Repúblika, tuir artigu 85, alinea j) Konstituisaun Repüblika Demokrátika Timor-Leste, konjuga ho artigu 2 alinea a) hosi artigu 5, Dekretu-Lei nu. 20/2009, 06 de maio dekreta atu fó Ordem de Timor-Leste Grau Medalla ba Embaixadór Reinu Tailândia Ekapol Poolpipat.

Iha entrevista, Embaixadór Reinu Tailândia, Ekapol Poolpipat hateten, simu kondekorasaun medalla ne’e hanesan onra bo’ot ida.

Medalla ne’e hanesan onra la’ós de’it ba nia maibé ba mós nia nia kolega sira, ba nia nasaun nomós ba Timor oan ne’ebé mak koopera ho Embaixada Tailándia durante tinan tolu.

Iha Tinan tolu liu ba, mundu hasoru dezafiu hanesan Covid-19 no lockdow, mudansa klimátika, impase polítika no ekonomia downturn maibé Tailándia no Timor-Leste kontinua programa no hala’o diálogu durante tinan tolu liu ba.

Tailándia oferese projetu dezenvolvimentu lubuk ida ba Timor-Leste hanesan implementa projetu iha eskola neen (6), inklui kombate mal nutrisaun, sanitasaun no programa sira hadi’ak estandar moris labarik no estudante sira nian iha Ermera, Baucau no iha munisípiu sira seluk.

Tinan kotuk, selebra tinan 20 aniversáriu kooperasaun bilateral entre Tailándia no Timor-Leste iha ne’ebé emabiaxada Tailándia organiza atividade komemorativu lubuk ida inklui reflorestasaun ai-parapa iha Hera Metinaro no mós organiza semináriu kona-ba Profil Timor Leste iha Tailándia.

“Ha’u fiar katak, iha tinan tuir mai Tailándia sei iha relasaun bilaterál ho Timor-Leste ida ne’ebé metin liu tan, tanba Timor Leste sei hola parte nu’udár membru ofisiál ASEAN. Antes to’o iha ne’ebá Tailándia sei oferese programa kapasitasaun rekursu umanu ba Timor Leste hodi prepara an prontu sai nu’udár membru ASEAN,” Ekapol Poolpipat hateten iha Palásiu Prezidensiál Nicolau Lobato Bairr-Pité, Kuarta (07/06/2023).

Iha tinan tolu liu ba, maske hasoru dezafiu oi-oin, nu’udár embaixadór Tailándia iha Timor-Leste inisia programa online traning ba organizasaun kooperativa sira no mós kursu téknika lubuk ida.

Tinan kotuk, Tailándia oferese bolsu estudu ho grau Maestradu ba Funsionáriu Timor oan na’in 20, programa bolsu estudu ne’e atu dignifika relasaun bilaterál Tailándia no Timor-Leste.

“Tailándia sei kontinua fó formasaun no bolsu estudu ba Timor oan sira atu asegura rekursu umanu Timor-Leste prontu atu hala’o serbisu bainhira sai membru ASEAN,” nia informa.

Iha tinan kotuk liurai Tailándia manda nota kongratulasaun ba Prezidente Repúblika José Ramos-Horta no reafirma komitmentu Tailándia nian atu hametin kooperasaun bilaterál ho Timor-Leste.

Jornalista: Vito Salvadór