Ramos-Horta Husu CNRT-PD Labele Ukun ho Vingansa

Hatutan.com, (10 Juñu 2023), Díli- Prezidente Repúblika (PR), José Ramos-Horta, husu bá Partidu Congresso Nasionál Reconstrução Timorense (CNRT) ho nia  aliadu Partidu Demokrátiku (PD) atu hamutuk ukun ho responsabilidade no labele halo persegisaun no vingansa polítika.

Lee Mós : Prezidente Repúblika Husu PD Prepara-an Di’ak-liu Atu Serví Povu Iha Futuru

Prezidente Repúblika (PR), José Ramos-Horta. Foto/Elio dos Santos da Costa

“Ha’u nia mensajen mak ne’e bá CNRT ho PD ne’ebé manán eleisaun ne’e atu forma Governu ha’u husu de’it mak buat ida favór labele hahú halo vingansa, persegisaun duni ema sai arbiru,” Prezidente Repúblika José Ramos-Horta iha nia diskursu iha serimónia  aniversáriu Partidu Demokrátiku bá dala-XXII iha Colmera, Díli, Sabádu (10/06/2023).

Ramos-Horta hateten, mesmu uluk adversáriu polítika halo karik, CNRT-PD labele halo, liu-liu ema ne’ebé tékniku estudu iha esperiénsia, bele hasai husi lider hanesan Prezidente Institutu Públiku maibé labele hasai kompletamente, klaru iha Governu foun hakarak tau Diretór Nasionál ida tenke kuidadu. Se la’e,  kada tinan-lima, Governu foun mai sira ne’ebé inosente loos dasa rai, motorista, guarda sivíl mós muda to’o leten ne’e mak labele.

“Haree didi’ak IX Governu sei hahú, maun Xanana sei haree saida mak halo. Sala klaru la repete sala, buat ne’ebé di’ak aproveita hadi’a halo di’ak liu tan. Tanba polítika ne’e la’ós Bíblia, ne’ebé labele muda, agora buat hotu-hotu haree bá planu estratéjiku, polítika governasaun tenke ita buka aproveita ema hotu-hotu ne’ebé di’ak no kompeténsia,” Ramos-Horta hateten.

Seidauk Simu Lista Kompozisaun Governu da-IX

Iha biban ne’e, José Ramos-Horta afirma kona-bá lista kompozisaun  Governu da-IX nian to’o agora nia seidauk simu.

“Primeiru-Ministru indijitadu sei halo konsulta liu tiha ona ho nia ekipa koligasaun CNRT-PD, enkuantu prontu ona mak lori mai Prezidente Repúblika,” Ramos-Horta tenik.

Xefe Estadu husu de’it bá Xefe Governu foun atu favór labele haluha ekilíbriu jéneru iha Governu nia laran, tenke haree tau feto sufisiente, labele mane de’it atu ukun  nasaun ne’e.

“Ita moris tanba iha feto, feto barak iha mundu ne’e matenek barak tebetebes, Timor mós feto barak matenek serbisu di’ak liu mane sira no komportamentu di’ak tebes,” Ramos-Horta hatutan.

Jornalista: Vito Salvadór