Funsionáriu Bombeiru Na’in-10 Partisipa Ezersísiu Salvamentu Tun-Tali

Hatutan.com, (12 Juñu 2023), Díli—Membru foun Bombeiru na’in-10 ne’ebé destakadu iha Unidade Espesiál Autoridade Protesaun Sívil (APC-Sigla Português), iha Segunda 12 Juñu, partisipa iha ezersísiu tun-tali ho objetivu atu halo salvamentu bá vítima sira bainhira enfreta dezastre.

Funsionáriu Bombeiru na’in-10 ne’ebé destakadu iha Unidade Espesiál Autoridade Protesaun Sívil (APC-Sigla Português), iha Segunda 12 Juñu, partisipa iha ezersísiu tun-tali ho objetivu atu halo salvamentu bá vítima sira bainhira enfreta dezastre. Foto/APC.

Komandante Unidade Espesiál Autoridade Protesaun Sivíl, Vitórino Lopez hateten, ezersísiu ne’e nu’udár parte ida atu kontinua fó hanoin bá membru foun sira, liu-liu ligadu ho matéria formasaun sira ne’ebé molok ne’e sira hetan ona iha formasaun dahuluk.

Lee Mós: Funsionáriu Bombeiru Na’in-96 Simu Posse

“Ami iha tékniku barak kona-bá salvamentu iha tasi, uma-andar no karik mós iha aviaun nian ho modelu tékniku ne’ebé ami nia ekipa unidade espesiál sira hetan durante ne’e atu la bele haluha maka ami sempre iha fulan ida ka rua, hala’o nafatin ezersísiu tun tali nune’e halo vizilánsia iha tereñu bainhira iha emerjénsia ruma halo salvamentu,” Hatutan.com sita deklarasaun Vitórino Lopez iha komunikadu.

Tékniku sira iha ezersísiu tun tali ne’e maka hanesan, tun ho modelu Amerikanu, Australianu, Espider, tun ho ulun no infantariás ne’ebé utiliza bá iha ezersísiu ne’e mak hanesan kaderina, musquitaun, oitu, kapasite, luvas korda dinámika, tanba sasán sira ne’e maka sai salvamentu bá iha isin-lolon.

Funsionáriu Bombeiru na’in-10 ne’e hanesan funsionáriu permanente ne’ebé simu posse iha  Tersa (4/4/2023) hamutuk ho funsionáriu na’in 86 seluk.

Jornalista: Rogério Pereira Cárceres