Prezidente Repúblika Nia Saúde Di’ak Loos

Hatutan.com, (16 Juñu 2023), Díli—Prezidente Repúblika (PR), José Ramos-Horta, Kinta (15/06/2023), halo ona konsulta saúde iha Royal Darwin Hospital iha Austrália. Rezultadu konsulta saúde Xefe Estadu nian hatudu nia saúde di’ak loos.

Lee Mós : Prezidente Repúblika To’o Ona iha Austrália

Prezidente Repúblika, José Ramos-Horta. Foto/Elio dos Santos da Costa

Informasaun ne’ebé Hatutan.com simu hosi fontes balun ne’ebé akompaña  Prezidente Repúblika iha Darwin-Austrália hateten, Prezidente Repúblika (PR), José Ramos-Horta la baixa iha ospitál, no médiku espesialista  sira ne’ebé fó asisténsia saúde  ka konsulta saúde Xefe Estadu nian hateten, Xefe Estadu Timor-Leste nia kondisaun saúde di’ak loos no presiza deskansa uitoan.

Ekipa médiku espesialista sira hosi Ospitál Royal Darwin mós fó hanoin ka autoriza ona atu Prezidente Repúblika bele fila mai Timor-Leste tanba laiha problema ho nia saúde. Nia la’o di’ak loos, fizikamente  estavel loos, maibé médiku privadu Prezidente Repúblika nian mak husu atu bele halo tan final medical check-up  Sesta (16/06/2023), hale’u tuku 10 dadeer ne’e, oras Darwin-Austrália.  

Fontes ne’e mós hateten,  rezultadu hosi final medical-check-up ne’e sai orasida, maka posivel Prezidente Repúblika, José Ramos-Horta, bele fila ona mai Timor-Leste iha Sábadu (17/06/2023) no se lae iha Domingu dadeer (18/03/2023).  

Lee Mós : Ramos-Horta Bá Konsulta Saúde Iha Austrália

Jornalista : Vito Salvadór