Sábadu Aban, Prezidente Repúblika To’o Fali iha Timor-Leste

Hatutan.com, ( 16 Juñu 2023), Díli—Prezidente Repúblika (PR), José Ramos-Horta, Sábadu (16/06/2023), fila hikas mai Timor-Leste hafoin halo tratamentu saúde iha Royal Darwin Hospital iha Austrália.

Lee Mós : Prezidente Repúblika Nia Saúde Di’ak Loos

Prezidente Repúblika, José Ramos-Horta, sai hosi Royal Darwin Hospital hafoin halo konsulta saúde, Sesta (16/6/2023). Foto/Repro

Iha loron 14 Juñu 2023, Prezidente Repúblika (PR), José Ramos-Horta, hala’o viajen urjente ida bá Darwin-Austrália, hodi bá halo tratamentu saúde ka medical check-up tanba iha loron hirak  liubá, Tersa-Kuarta (13-14/06/2023), Prezidente Repúblika, José Ramos-Horta, la tama servisu hanesan baibain tanba moras no presiza deskansa uitoan.

Informasaun hosi fontes Hatutan.com nian ne’ebé akompaña Prezidente Repúblika bá halo konsulta saúde iha  Royal Darwin Hospital informa, Prezidente Repúblika, José Ramos-Horta, tuku 10.00 Oras Darwin, finaliza ona nia jenerál medical check-up  no rezultadu hatudu katak,  Xefe Estadu Repúblika Demokratika Timor-Leste (RDTL) nia saúde di’ak loos. Ho nune’e, Prezidente Repúblika, bele fila ona mai Timor-Leste iha Sábadu aban (17/06/2023).

Daudaun ne’e Prezidente Repúblika, José Ramos-Horta, fila ona bá otél hodi deskansa no hodi hein atu aban fila mai Timor-Leste.

Lee Mós : Ramos-Horta Bá Konsulta Saúde Iha Austrália

Jornalista : Vito Salvadór