Hatutan.com, (20 Juñu 2023), Dili—Policia Ciêntífica e de Investigação Criminial (PCIC), liuhosi Investigadór Xefe sira, prosesa ona membru ho inisiál JK ne’ebé deskonfia baku ajente ida hosi Polisia Nasional Timor-Leste (PNTL) iha área Hudi-laran, Kinta (08/06/2023).
Prossesu averiguasaun ka investigasaun interna bá Oknum PCIC ne’e rasik oras ne’e investigadór sira investiga hela.
Lee Mós: Tenke Fó Sansaun Todan Bá Oknum PCIC Ne’ebé Baku Membru PNTL To’o Grave
Portavós PCIC, Octávio da Costa Araújo informa relasiona ho dezentendimentu ne’ebé mosu entre oknum PCIC ho membru PNTL ne’e, avansa ho prosesu rua.
Ida avansa ho prosesu krime ne’ebé rejista ona iha Departamentu Investigasaun Kriminál (DIK), PNTL ho NUC 0160/23.PNSIK, kona-bá Krime Ofensas Integridade Fízika Simplés. Ida seluk halo mós prosesu interna ho naran Prosesu Averiguasaun ka investigasaun, ne’ebé mak rejista ona ho prosesu númeru 06/VI/AV.2023.
“Entaun, prosesu rua mak ita la’o dala-ida. Iha kazu ida ne’e, hakarak hatudu ninia imparsialidade, transparénsia,” Octávio da Costa Araújo hateten liuhosi konferénsia imprénsa iha kna’ar fatin, Caicoli, Tersa (20/06/2023).
Prosesu averiguasaun ne’e, fó mós biban bá membru PNTL JL ne’ebé mak ofendidu, nia iha kualkér tempu bele bá akompaña no halo konfirmasaun katak, prosesu averiguasaun ne’ebé mak la’o ne’e, nia andamentu to’o iha ne’ebé.
“Entaun, ami loke dalan bá nia, hanesan ofendidu bá iha prosesu ida ne’e, atu bele kualkér tempu, nia bele mai check, nia prosesu ne’e, andamentu to’o iha ne’ebé. Prosesu averiguasaun mak rejistu ona ho númeru 06/VI/AV.2023,” Portavós Octávio Araújo hateten.
Kazu insidente entre membru na’in-rua hosi instituisaun seguransa ne’e akontese iha arredór Otél Hong-Kong, ne’ebé lokaliza iha área Hudi Laran, Suku Bairro-Pité, Postu-Administrativu Dom Aleixo, Munisipiu Dili, Kinta (08/06/2023), hale’u tuku-lima (05:00) dadeer madrugada, Otl.
Jornalista: Rogério Pereira Cárceres
