Hatutan.com, (22 Juñu 2023), Díli—Deputada hosi Partidu Congresso Nacional Reconstrucção Timorense (CNRT), Fernanda Lay, eleita nu’udár Prezidente Parlamentu Nasionál (PPN) periudu 2023 to’o 2028 ho votu a-favór 45, kontra 0, abstensaun 19 no branku 1.
“Nune’e, rezultadu mak ne’e no Deputada Maria Fernanda Lay eleita bá Prezidente Parlamentu Nasionál,” Prezidente PN sesante V Lejislatura, Aniceto Longuinhos Guterres Lopes deklara rezultadu votasaun iha plenária PN, Kinta (22/06/2023).
Lee Mós: Ini Alasan CNRT Calonkan Maria Fernanda Lay Jadi Ketua Parlemen Timor Leste
Iha biban ne’e kedan Aniceto Guterres parabeniza deputada Maria Fernanda Lay tanba hetan ona konfiansa hosi deputadu no deputada foun sira VI Lejisltura nian hodi lidera meza PN, durante mandatu tinan lima.
“Primeira muller timorense eleita nu’udár Prizidente Parlamentu Nasionál, titulár de órgaun de soberania. Tanba ne’e, parabens bá Prezidente Parlamentu Nasionál foun, destinta deputada Maria Fernanda Lay. Parabéns bá feto Timor no Parabéns bá povu Timor-Leste tomak,” Aniceto Guterres parabeniza.
“Agora, tuir mai ha’u nia kna’ar dirije meza ne’e hotu iha ne’e. Sei iha ajenda sira tuir mai, maibé Prezidente Parlamentu foun mak agora assume iha ne’e,” Aniceto Guterres hakotu.
Ho rezultadu eleisaun ida ne’e, Deputada CNRT ne’e mak hahú lidera meza Parlamentu Nasionál durante mandatu VI Lejislatura.
Totál buletim votu ne’ebé fahe bá deputadu foun sira hodi vota hamutuk 65. Hosi totál buletim hirak ne’e, atribui votu a-favór hamutuk 45, kontra 0, abstensaun 19 no branku 1.
Hosi rezultadu eleisaun ida ne’e hahú hosi ohin Kinta (22/06/2023) bá oin, deputada CNRT, Maria Fernanda Lay mak lidera sesaun plenária sira VI Lejislatura nian.
Jornalista: Rogério Pereira Cárceres
