Akordu Kormérsiu Esensiál ASEAN Iha Tolu

Hatutan.com, (23 Juñu 2023), Díli—Ministériu Negósiu Estranjeiru no Kooperasaun (MNEK) no Gabinete Ministru Koordenadór ba Asuntu Ekonómiku (MKAE) ho apoiu hosi Governu Austrália hala’o workshop kona-bá “Komunidade Ekonómia ASEAN nia Akordu Komérsiu Esensiál – Elementu Savi no Implikasaun ba Timor-Leste” hosi loron 20 to’o 22 Juñu 2023 iha City 8, Has-Laran, Díli, Timor-Leste.

Ministériu Negósiu Estranjeiru no Kooperasaun (MNEK) no Gabinete Ministru Koordenadór ba Asuntu Ekonómiku (MKAE) ho apoiu hosi Governu Austrália hala’o workshop kona-bá “Komunidade Ekonómia ASEAN nia Akordu Komérsiu Esensiál – Elementu Savi no Implikasaun ba Timor-Leste” hosi loron 20 to’o 22 Juñu 2023 iha City 8, Has-Laran, Díli, Timor-Leste. Foto/MKAE.

Workshop ne’e halibur Governantes Ofisiál sira hosi Sentrál ho Liña Ministeriál no mós parte interesante sira hodi hasa’e koñesimentu kona-bá Komunidade Ekonomia ASEAN nia Akordu Komérsiu Esensíal tolu mak hanesan, ASEAN nia Akordu Komérsiu ba Sasan (Inglés ATIGA), ASEAN nia Akordu Komérsiu ba Atendimentu Servisu (Inglés ATISA) no ASEAN nia Akordu Investimentu Komprehensivu (Inglés ACIA).

Lee Mós: MCAE Prepara Dokumentu Kona-bá Adezaun TL Ba OMK

Ratifikasaun hosi akordu esensiál tolu ne’e sei sai hanesan savi komponente ida ne’ebé kumpri rekerimentu hosi ASEAN nia Roteiru ba Timor-Leste, hodi sai membru permanente ASEAN ne’ebé aprova ona iha ASEAN nia Simeira ba dala-40 no 41 iha Novembru 2022.

“Foku hosi workshop ne’e, maka hakarak atu introdús savi akordu hosi ASEAN nian ba partisipantes sira, partikularmente membru ekipa Komunidade Ekonomia ASEAN ne’ebé responsabiliza bá Timor-Leste nia integrasaun ba ASEAN, hodi forma fundasaun Komunidade Ekonomia ASEAN,” Hatutan.com sita deklarasaun Vise-Ministru Komérsiu no Indústria, Domingos Antunes iha komunikadu, Sesta (23/06/2023).

Austrália nia Chargé d’Affaires, Caitlin Wilson hateten, Austrália orgullu bele la’o hamutuk ho Timor-Leste hanesan kolega no mós parseiru ida iha jornada adezaun ASEAN.

“Ekonomikamente, membru ASEAN sei apoiu Timor-Leste hodi asesu ba merkadu ne’ebé dinámiku no dezenvolvidu. Koñesimentu ba ASEAN nia Plataforma ekonomia sei ajuda maksimiza benefísiu ekonomia ASEAN no informa prioridade reforma doméstika,” nia hateten.

Jornalista: Rogério Pereira Cárceres