Xefe Redasaun Hatutan.com Presta Deklarasaun iha MP

Hatutan.com, (23 Juñu 2023), Díli—Xefe Redasaun Mídia online Hatutan.com, Francisco Belo Simões da Costa, Sesta (23/06/2023), hale’u tuku 10:00 dadeer OTL, presta deklarasaun iha Ministériu Públiku (MP), hodi kumpre bá notifikasaun komparénsia (Notificação Comparência) hosi Sekretaria Inspesaun Ministériu Públiku (MP) nian.

Xefe Redasaun Mídia online Hatutan.com, Francisco Belo Simões da Costa, Sesta (23/06/2023), hale’u tuku 10:00 dadeer OTL, presta deklarasaun iha Ministériu Públiku (MP), hodi kumpre bá notifikasaun komparénsia (Notificação Comparência) hosi Sekretária Inspesaun Ministériu Públiku (MP) nian. Foto/Elio dos Santos da Costa.

Iha Kinta, 22 fulan-Juñu 2023, hale’u tuku 15:00 OTL, Xefe Redasaun Mídia Online Hatutan, Francisco Belo Simões, ne’ebé nu’udár membru Conselho de Imprensa de Timor Leste, simu notifikasaun MP nian ho númeru referénsia 84/IMP/2023, ne’ebé asina hosi Sekretaria Inspesaun Ministériu Públiku nian, Eliana Flora Pereira.

Lee Mós: MP Notifika Jornalista Hatutan.com Rogério Pereira Cárceres Hodi Presta Deklarasaun

Notifikasaun ne’e baze bá despaixu hosi Inspetora Ministériu Públiku, Dra. Zélia Trindade, atu rona deklarasaun hosi Xefe Redasaun Hatutan.com, Francisco Belo Simões.

Tuir opiniaun jurídiku hosi Hatutan.com nia fonte balun fó hanoin dehan,  Nontificação Comparência ne’e katak ema ka pessoál ne’ebé hetan notifikasaun ida-ne’e atu bá konfirma de’it asuntu balun ka dokumentu balun ne’ebé iha relasaun ho investigasaun ne’ebé Ministériu Públiku halo hela.

Hafoin presta tiha deklarasaun, Francisco Belo Simões revela katak, hanesan jornalista no sidadaun, iha obrigasaun atu kumpre notifikasaun  hosi na’in bá asaun  penal ka Ministériu Públiku relasiona ho dokumentu balun ne’ebé Hatutan.com hetan hodi publika iha notísia Hatutan.com nian, edisaun 19 fulan-Maiu 2023, ho títulu notísia, “Deskonfia, PGR Alfonso Lopez ho Nia Asesór Jurídiku Óscar Tavares Uza Osan Estadu Halo “Viajen Privadu” iha Portugal”.

Francisco Belo Simões mós afirma katak, iha prosesu ne’e nia la ko’alia relasiona ho dokumentu sira ne’ebé sai baze bá publikasaun notísia Hatutan.com nian ne’e tanba konsidera sijilu profisionál ne’ebé prevalese iha Lei Komunikasaun Sosiál artigu 19 kona-bá Direitu Jornalista nian iha númeru 4, hateten, jornalista iha direitu atu rai segredu profisionál hodi la bele obriga nia atu fó sai ninia fonte sira informasaun nian, maibé bele halo ida-ne’e bainhira Tribunál mak haruka tuir hakerek iha lei prosesu penal nian.

Ekipa Redasaun Mídia online Hatutan.com hasai foto hamutuk edifísiu Hatutan.com Praia dos Coqueiros, Díli, Sesta (23/06/2023). Foto/Hatutan.com.

Iha Kode Étika Jornalístika Timor-Leste nian iha númeru 4 mós  haktuir, Sempre hetan informasaun, dokumentu ho imajen sira ho forma legál no profisionál, respeita kompromisu konfidensialidade ho fonte informasaun sira, hanesan off the record, pedidu konfidensialidade no embargu.

Relasiona ho notísia “Deskonfia, PGR Alfonso Lopez ho Nia Asesór Jurídiku Óscar Tavares Uza Osan Estadu Halo “Viajen Privadu” iha Portugal”, Xefe Redasaun Hatutan.com ne’ebé hahú hala’o knar profisionál jornalista iha 2001 to’o mai ohin loron ne’e esplika katak, notísia ne’ebé Hatutan.com  publika ne’e la viola prinsípiu universal jornalizmu nian, la viola Kode Étika Jornalístika no kumpre tiha ona prosedimentu bá ezersísiu Direitu Hatán no Retifikasaun iha  regulamentu númeru 4/2017, loron 4 fulan-Abríl.

Notísia sira iha relasaun ho vizita delegasaun Prokuradór Jerál Repúblika (PGR), Alfonso Lopez bá partisipa iha enkontru PGR sira nasaun membru CPLP nian iha Guinea-Bissau to’o hala’o vizita mai  iha Lizboa-Portugál,  mak hanesan notísia ho títulu no edisaun sira mak hanesan:

• Estadu Timor-Leste Emite Pasaporte Servisu bá Sidadaun Estranjeiru Ida ho Nasionalidade Caboverdiano, edisaun 27 fulan-Abríl 2023
• PGR Sira Membru CPLP Diskute Hametin Autonomia Ministériu Públiku, edisaun 09 fulan-Maiu 2023
• Deskonfia, PGR Alfonso Lopez ho Nia Asesór Jurídiku  Óscar Tavares Uza Osan Estadu Halo “Viajen Privadu” iha Portugal, edisaun 19 fulan-Maiu 2023
• Direitu Resposta: PGR Alfonso Bá Portugal Reprezenta Estadu, edisaun 20 fulan-Maiu 2023.

Lee Mós: Deskonfia, PGR Alfonso Lopez ho Nia Asesór Jurídiku Óscar Tavares Uza Osan Estadu Halo “Viajen Privadu” iha Portugal

Lee Mós: Direitu Resposta: PGR Alfonso Bá Portugál Reprezenta Estadu

Jornalista: Vito Salvadór